Mae prifddinas Caerdydd yn gyrchfan boblogaidd, gan groesawu bron i 22 miliwn o ymwelwyr o bob cwr o’r byd bob blwyddyn.

Mae Caerdydd yn ddewis gwych ar gyfer diwrnod allan i’r teulu neu am wyliau hirach. Mae’n ddinas fach yn llawn pethau i’w gwneud i bobl o bob oed, ac mae’n hawdd mynd o’i chwmpas. Os byddwch chi’n teithio gyda phlant bach neu bobl ifanc yn eu harddegau, fe gewch ddigon i ddiddanu pawb heb orfod treulio’r diwrnod cyfan yn cynllunio.

O gestyll ac amgueddfeydd i atyniadau dan do a mannau gwyrdd, mae gan Gaerdydd lawer i’w gynnig. Gallwch gynllunio diwrnod llawn allan, gan ddewis gwneud gweithgareddau fel y mynnwch, neu gadw pethau’n syml gyda lleoedd am ddim i’w harchwilio.

 

1. Ewch yn wyllt yn y jyngl yn Treetop Adventure Golf

Yng nghanol y ddinas, mae Treetop Adventure Golf yn troi gêm syml o golff bach yn antur jyngl llawn cyffro. Wrth i chi gamu i mewn, byddwch yng nghanol synau a golygfeydd coedwig law.

Ar y cwrs 18 twll, fe gewch eich arwain drwy ganopi deiliog y goedwig law, heibio twcaniaid lliwgar a brogaod sy’n canu, tra bydd mellt a tharanau’n diasbedain. Os byddwch chi’n goroesi’r her hon, rhowch gynnig ar y cwrs 18 twll nesaf. Drwy dir yr Asteciaid, ceisiwch dawelu’r ysbrydion hynafol a chroesi’r Afon gyfriniol.

Mae’n gweithio’n dda i grwpiau oedran cymysg hefyd. Gall plant iau gymryd eu hamser, a gall plant hŷn ac oedolion fynd amdani yn yr her. Os nad ydych chi’n chwarae, mae’n dal yn ddifyr gwylio, ac mae bwyd ar y safle os ydych chi awydd aros yn hirach. Opsiwn cadarn pan fyddwch chi’n chwilio am bethau llawn hwyl i’w gwneud yng Nghaerdydd gyda phlant, yn enwedig ar ddiwrnod gwlyb.

 

2. Mae dysgu’n hwyl yn Techniquest

Techniquest, ym Mae Caerdydd, yw’r ganolfan wyddoniaeth sydd wedi bodoli hiraf yn y DU, ac mae’n cynnig anturiaethau rhyngweithiol manwl i blant ac oedolion. Wedi’u creu gan arbenigwyr blaenllaw ym meysydd cyfathrebu gwyddoniaeth, mae eu harddangosfeydd wedi ymddangos ledled y byd.

Agorodd y ganolfan ym 1988 gyda 100 o arddangosfeydd, ac mae hi wedi tyfu’n aruthrol. Erbyn hyn, mae gan y ganolfan ei hadeilad pwrpasol ei hun gyda lle ar gyfer mwy o arddangosfeydd, mwy o ymwelwyr a mwy yn digwydd, bob dydd. Y tu mewn, fe welwch arddangosfeydd rhyngweithiol sy’n dangos popeth o ffiseg a pheirianneg i ofod, sain a bioleg ddynol. Bydd botymau’n cael eu gwasgu. Bydd olwynion yn cael eu troi. Bydd cwestiynau’n cael eu gofyn. Mae’r cyfan wedi cael ei ddylunio er mwyn i blant allu archwilio fel maen nhw’n ei ddymuno, yn aml heb sylweddoli eu bod yn dysgu ar hyd y ffordd.

Gan gynnig amrywiaeth eang o ddigwyddiadau fel diwrnodau i blant bach a sioeau planetariwm, gall y teulu cyfan fwynhau dysgu. Mae’r caffi ar y safle yn lle gwych i gael hoe, tamaid i’w fwyta a phaned o goffi.

 

3. Bownsio ym Mharc Trampolîn Infinity

Os oes angen i’ch grŵp losgi rhywfaint o egni, efallai mai Parc Trampolîn Infinity yw’r union beth. Mae dros 70 o drampolinau yn mynd o un i’r llall , i greu gofod perffaith ar gyfer symud, neidio, fflipio a phrofi cydsymud mewn ffyrdd sy’n teimlo’n fwy fel chwarae nag ymarfer corff.

Mae llawer o amrywiaeth tu mewn. Ochr yn ochr â’r prif ardaloedd trampolîn, fe welwch resi pêl-fasged, parthau gêm osgoi’r bêl, a mannau perfformio i unrhyw un sy’n awyddus i roi cynnig ar rywbeth newydd. Does dim rhaid i chi fod yn hyderus nac yn brofiadol ychwaith. Mae staff wrth law i wneud yn siŵr bod popeth yn ddiogel, ac mae’r rhan fwyaf o bobl yn ymgyfarwyddo’n gyflym unwaith iddyn nhw ddechrau bownsio.

Mae Infinity hefyd yn cynnal sesiynau penodol ar gyfer plant iau, yn ogystal â sesiynau cynhwysol sydd wedi’u cynllunio i greu amgylchedd tawelach gyda’r goleuadau a’r sain wedi’u haddasu. Mae’r hyblygrwydd hwnnw’n golygu ei fod yn lle da i deuluoedd sydd ag anghenion a galluoedd gwahanol.

 

4. Crwydro Castell Caerdydd

Yng nghanol y ddinas, mae Castell Caerdydd yn un o’r lleoedd amlwg nad oes modd ei fethu. Unwaith y byddwch chi tu mewn, mae llawer mwy i’w weld nag y byddech chi’n ei ddisgwyl. Mae’r tir o amgylch y castell yn adrodd straeon sy’n ymestyn yn ôl bron i 2,000 o flynyddoedd, o olion Rhufeinig i waliau Normanaidd a thu mewn o oes Fictoria.

Gall teuluoedd grwydro’r mannau agored wrth eu pwysau, dringo’r Tŵr Normanaidd i gael golygfeydd eang ar draws y ddinas, neu fynd o dan y ddaear i weld y llochesi adeg y rhyfel. Mae’n gymysgedd da o fannau cysgodol a mannau archwilio yn yr awyr agored, sy’n help mawr os ydych chi’n dod â phlant gyda chi sy’n hoffi symud drwy’r amser.

I deuluoedd sy’n chwilio am bethau i’w gwneud yng Nghaerdydd, mae’r Castell yn lle da i fynd iddo fel rhan o ddiwrnod allan ehangach. Mae’n ganolog, yn hawdd ei gyrraedd ac yn agos at atyniadau eraill os ydych chi eisiau dal ati i grwydro a gweld.

Cardiff Castle

 

5. Darganfod deinosoriaid yn Amgueddfa Genedlaethol Caerdydd

Os ydych chi’n chwilio am bethau i’w gwneud yng Nghaerdydd am ddim, mae’r Amgueddfa Genedlaethol yn lle da i ddechrau. Mae mynediad am ddim ac mae’r orielau’n cynnig digon i gynnal diddordeb plant, yn enwedig yr arddangosfeydd deinosoriaid (sy’n aml yn ffefryn mawr).

Y tu mewn, fe welwch sgerbydau mawr, arddangosfeydd rhyngweithiol a lle i symud o gwmpas heb deimlo eich bod yn cael eich rhuthro. Ochr yn ochr â hanes naturiol, mae casgliadau celf ac arddangosfeydd dros dro. Yn aml, bydd rhywbeth newydd i’w weld, hyd yn oed os ydych chi wedi ymweld o’r blaen.

Mae’r amgueddfa’n ddewis da os ydych chi am gael gweithgaredd tawelach, neu hoe rhwng cynlluniau mwy prysur. Gan fod yr amgueddfa yng nghanol y ddinas, mae’n ffitio’n daclus mewn diwrnod o grwydro’r ddinas ar droed.

 

Os mai ymweld â Chaerdydd am benwythnos hir ydych chi neu’n trefnu gwyliau teulu llawn, mae digon o ffyrdd i lenwi eich amser. O weithgareddau egnïol dan do i leoliadau diwylliannol am ddim, mae’n ddinas sy’n gadael i chi lywio’r diwrnod o amgylch eich teulu.

Y ffordd hawsaf o deithio o amgylch Caerdydd

Mae’n hawdd mynd o gwmpas Caerdydd, yn enwedig os ydych chi’n teithio fel teulu. Mae llawer o atyniadau’r ddinas o fewn cyrraedd hawdd i’w gilydd. Mae trenau, bysiau, cerdded a beicio yn ei gwneud hi’n hawdd mynd o le i le, heb orfod poeni am barcio.