Eisteddfod 2026
Yn TrC, ymfalchïwn yn ein gallu i'ch cysylltu â chalon diwylliant Cymru, ac nid oes unrhyw ddigwyddiad mwy canolog i'n hunaniaeth na'r Eisteddfod. Mae'r ŵyl deithiol hon yn ddathliad enfawr o'r Gymraeg, cerddoriaeth a'r celfyddydau, gan groesawu pawb o siaradwyr rhugl i'r rheiny nad ydynt erioed wedi clywed gair o Gymraeg.
Teithio ar y trên yw un o'r ffyrdd mwyaf cynaliadwy a di-straen i ymuno â'r dathliadau, gall eich galluogi i osgoi unrhyw dagfeydd ger digwyddiad mor boblogaidd.
Rydym yn gweithio'n agos gyda phartneriaid allweddol i'ch helpu i deithio'n hawdd ac yn gynaliadwy i'r Maes ac oddi yno. Bydd manylion llawn yn cael eu cadarnhau'n fuan. Edrychwch yn ôl yma am y wybodaeth ddiweddaraf.
Yr Eisteddfod Genedlaethol
Yr Eisteddfod Genedlaethol yw pinacl calendr diwylliannol Cymru. Mae'n ddigwyddiad gwirioneddol unigryw sy'n symud rhwng gogledd a de Cymru am yn ail, gan drawsnewid darn o dir yn bentref bywiog o gân, dawns a llenyddiaeth.
Mae'n un o wyliau cerddoriaeth a barddoniaeth mwyaf Ewrop; gwledd o ddiwylliant sy'n dathlu popeth Cymraeg gan ddenu hyd at 170,000 o ymwelwyr bob blwyddyn.
P'un a ydych chi yno i weld cadeirio mawreddog y bardd neu i fwynhau cerddoriaeth gyfoes, neu'r celfyddydau gweledol, mae'r awyrgylch yn gwbl Gymreig. Peidiwch â phoeni os nad ydych chi'n siaradwr Cymraeg; mae'r ŵyl yn hynod gynhwysol a hyd yn oed yn cynnig gwersi iaith ar y safle i chi ddechrau.
Rhagflas o’r Maes
Mae safle'r ŵyl, sef Y Maes, yn bentref prysur o bafiliynau a llwyfannau. Er ei bod yn llawn traddodiad sy'n deillio o 1176, mae Eisteddfod heddiw yn ddathliad o'r 21ain ganrif sy'n cyfuno seremonïau hynafol â diwylliant cyfoes arloesol.
- Y Pafiliwn: Y canolbwynt ar gyfer cystadlaethau mawr cerddoriaeth, dawns a drama. Ar ôl iddo dywyllu, mae'n trawsnewid i leoliad ar gyfer cyngherddau pop cerddorfaol llawn sêr.
- Gorsedd y Beirdd: Dan arweiniad yr Archdderwydd, mae’r Orsedd yn mynychu seremonïau mewn eu gwisgoedd gwyn, glas neu wyrdd, yn ddibynnol ar eu harbenigedd. Gallwch wylio Coroni a Chadeirio'r beirdd, defodau eiconig sy'n anrhydeddu beirdd gorau Cymru.
- Y Lle Celf: Dathliad cenedlaethol o'r celfyddydau gweledol a phensaernïaeth sy'n cynnwys arddangosfeydd gan artistiaid cyfoes mwyaf blaenllaw Cymru.
- Pentref Gwyddoniaeth a Thechnoleg: Canolfan o arbrofion ac arddangosiadau rhyngweithiol wedi'u cynllunio i ddiddanu ac addysgu meddyliau chwilfrydig.
- Maes B: Brawd bach yr Brifwyl, sy'n cynnwys gigs gyda’r hwyr gan fandiau pop a roc gorau o Gymru.
- Maes D: mae'r ardal hon yn cynnig lle cyfeillgar i siaradwyr Cymraeg newydd ymarfer ymadroddion a sgwrsio ag arbenigwyr.
Pryd: Yn draddodiadol, mae'r dathliad enfawr, teithiol hwn o ddiwylliant Cymreig yn cael ei gynnal yn ystod wythnos gyntaf Awst. Bydd digwyddiad 2026, Eisteddfod y Garreg Las, yn cael ei chynnal yng ngogledd Sir Benfro rhwng Sadwrn 01 Awst 2026 ac Sadwrn 08 Awst 2026.
Teithio'n glyfar a gweld mwy
Mae defnyddio ein rhwydwaith i gyrraedd yr Eisteddfod Genedlaethol nid yn unig yn ddewis sy'n ymwybodol o'r amgylchedd ond hefyd yn ffordd sy’n osgoi’r drafferth o yrru.
Cynlluniwch ymlaen llaw: Gwiriwch yr amseroedd trenau diweddaraf a'r gwasanaethau bws cysylltu gan ddefnyddio ein cynllunydd taith cyn i chi deithio.
Archebwch yn Uniongyrchol: Cofiwch archebu eich tocynnau gyda ni am y prisiau isaf, heb ffioedd archebu.
Cadw ein cwsmeriaid yn ddiogel yn ystod digwyddiadau
Gall digwyddiadau mawr olygu bod mwy o bobl nag arfer yn defnyddio ein gwasanaethau. Byddwn yn cymryd camau ychwanegol i gadw ein cwsmeriaid i deithio’n ddiogel ac yn ddibynadwy.
