Arolwg Teithio Cenedlaethol Cymru: Adborth ar yr opsiynau cyhoeddi

Crynodeb o adborth rhanddeiliaid

 

Diwygiad Terfynol

---

Dyddiad Cyhoeddi 29 Tachwedd 2024

---

 

Yn ystod hydref 2024, fe wnaethom gysylltu â rhanddeiliaid i ddeall eu dewisiadau o ran y cyhoeddiadau ystadegol o Arolwg Teithio Cenedlaethol Cymru, pan fyddant ar gael. Fe wnaethom gysylltu â thros 150 o randdeiliaid a chawsom 35 ymateb, sef cyfradd ymateb o 23%. Roedd y rhanddeiliaid hyn wedi mynegi diddordeb yn yr Arolwg yn y gorffennol neu wedi mynychu un o’r Sesiynau Ymgysylltu â Rhanddeiliaid yng ngwanwyn 2024.

Daw’r rhan fwyaf o’r ymatebion gan gydweithwyr sy’n ymwneud â pholisi trafnidiaeth, yn gweithio’n bennaf i Trafnidiaeth Cymru, Llywodraeth Cymru, Awdurdodau Lleol a grwpiau llywodraeth leol. Byddwn yn parhau i fonitro adborth ac ymgysylltu â defnyddwyr a grwpiau sydd â diddordeb wrth i ni barhau i ddatblygu’r Arolwg.

 

2.1. Yr opsiynau cyhoeddi sy’n cael eu ffafrio

Gwnaethom gyflwyno pum opsiwn cyhoeddi gwahanol ar gyfer datganiadau pwnc-benodol, yn cynnwys enghraifft weledol o sut y byddent yn edrych, manylion am eu hyd, eu fformat, a pha mor gyflym y byddent ar gael i ddefnyddwyr. Gofynnwyd i’r ymatebwyr restru’r opsiynau yn ôl eu trefn blaenoriaeth nhw.

Mae’r ymatebion wedi cael eu sgorio ar raddfa o 1 i 5, lle mae 1 = yn cael ei ffafrio leiaf a 5 = yn cael ei ffafrio fwyaf. Mae’r sgoriau’n cael eu cyflwyno fel canran o 175, y sgôr uchaf sydd ar gael (35 * 5 = 175).

Ffigur 1: Dewis o opsiynau cyhoeddi (canran o'r sgôr uchaf)

Yr opsiwn cyhoeddi a gâi ei ffafrio fwyaf oedd adnodd siart rhyngweithiol, ac yna erthygl data canolig ei hyd a chrynodeb byr. Roedd y ddau opsiwn hirach, bwletinau manwl a llyfrau ffeithiau modd, yn llai poblogaidd. Mae Ffigur 1 yn dangos sut y sgoriodd yr opsiynau cyhoeddi.

 

2.2. Dewisiadau demograffig a daearyddol

Roeddem hefyd wedi gofyn i ymatebwyr am eu dewisiadau o ran dadansoddiadau demograffig a daearyddol i lywio blaenoriaethau dadansoddi. Roedd yr ymatebwyr yn cael dewis pob opsiwn a oedd yn cyd-fynd â’u diddordebau. Mae Ffigur 2 yn dangos canran yr ymatebwyr a ddewisodd yr opsiynau a oedd ar gael.

Ffigur 2: Dewis o ran newidynnau demograffig a daearyddol (canran yr ymatebwyr)

Ymddygiad a phatrymau trafnidiaeth yn ôl gallu yn y Gymraeg (43%) ac Ethnigrwydd (71%) oedd y lleiaf poblogaidd o’r opsiynau ymateb a gyflwynwyd. Roedd gweddill yr opsiynau i gyd yn sgorio’n uchel iawn. O ystyried absenoldeb hirdymor Arolwg Teithio Cenedlaethol sy’n benodol i Gymru, nid yw hyn yn syndod.

 

2.3. Achosion defnydd yr Arolwg

Mae’r Arolwg wedi’i ddylunio i fonitro cynnydd yn erbyn yr ymrwymiadau a amlinellir yn Llwybr Newydd: Strategaeth Drafnidiaeth Cymru 2021 a thargedau Cymru Sero Net. Fodd bynnag, rydym wedi ymgorffori adborth gan randdeiliaid i sicrhau gwerth i grŵp ehangach o ddefnyddwyr. Pan ofynnwyd iddynt sut y byddant yn defnyddio data o’r Arolwg, soniodd ymatebwyr am amrywiaeth o ddefnyddiau polisi, gwerthuso a chynllunio:

• “Deall ymddygiad trafnidiaeth yng Nghymru a ledled Cymru”
• “Cyfrannu at ddatblygu polisi ar lefel genedlaethol a rhanbarthol a llywio’r gwaith o bennu cyllidebau”
• “Cynllunio trafnidiaeth a datblygu polisi ledled Cymru”
• “Tystiolaeth i gefnogi’r gwaith o asesu prosiectau”
• “Sefydlu’r llinell sylfaen ar gyfer patrymau teithio”
• “Deall effaith strategaeth drafnidiaeth genedlaethol dros amser”

Mae’r defnyddiau hyn yn ychwanegol at yr achosion defnydd a nodwyd yn y gwaith ymgysylltu a wnaed yn ystod hydref 2023 gyda chydweithwyr polisi, a rhanddeiliaid ehangach yng ngwanwyn 2024.

 

Ar sail yr adborth hwn, bydd tîm prosiect yr Arolwg yn datblygu ac yn profi adnodd siart rhyngweithiol, ynghyd â datblygu fframwaith ar gyfer bwletinau byr ac erthyglau data. Byddwn yn ystyried adnoddau ychwanegol i fynegi cryfderau, gwendidau a chyd-destun ychwanegol y data i ddefnyddwyr yn gryno. Byddwn yn ymgysylltu â rhanddeiliaid a defnyddwyr i sicrhau bod yr adnoddau hyn yn diwallu anghenion eu defnyddwyr, ac i ddeall ymhellach eu dewisiadau o ran cynnwys er mwyn blaenoriaethu dadansoddiadau yn effeithiol.

Byddwn yn parhau i estyn allan at grwpiau rhanddeiliaid a defnyddwyr posibl wrth i’r Arolwg ddatblygu.

 

Cyhoeddwyd y papur opsiynau cyhoeddi ar wefan Trafnidiaeth Cymru fel dogfen annibynnol.

 

1. Enw Cyntaf

[Testun]

 

2. Cyfenw

[Testun]

 

3. Sefydliad (os yw’n berthnasol)

[Testun]

 

4. Cyfeiriad e-bost

[Testun]

 

5. Pa ddadansoddiadau daearyddol o ddata fyddech chi'n hoffi i ni eu cyhoeddi?

• Lefel Genedlaethol
• Lefel Ranbarthol
• Lefel Awdurdod Lleol

 

6. Pa ddadansoddiadau demograffig o ddata fyddech chi'n hoffi i ni eu cyhoeddi?

• Oed
• Rhyw
• Anabl/Ddim yn Anabl
• Gallu siarad Cymraeg
• Ethnigrwydd
• Dim un o'r uchod

 

7. Rhowch yr opsiynau cyhoeddi isod ar gyfer yr Arolwg yn nhrefn blaenoriaeth

• Crynodeb byr
• Siart rhyngweithiol
• Erthygl data
• Bwletin manwl
• Llyfr ffeithiau

 

8. A fydd y data a gesglir o ddiddordeb i chi pan gaiff ei gyhoeddi?

• Bydd
• Na fydd

 

9. Sut byddwch chi'n defnyddio data'r Arolwg?

[Testun]

 

10. Os hoffech chi weld y data'n cael ei gyhoeddi mewn ffordd arall, gyda dadansoddiadau daearyddol neu ddemograffig, rhowch wybod i ni yn y blwch isod.

[Testun]

 

11. Hoffwn gael y wybodaeth ddiweddaraf am unrhyw ddatblygiadau neu gyfleoedd ymgysylltu yn y dyfodol sy'n ymwneud ag Arolwg Teithio Cenedlaethol Cymru

• Iawn (drwy e-bost)
• Na