Ymweld â Lerpwl

Nid yw Lerpwl yn dala’n ôl, ac ni ddylech chithau wneud hynny chwaith. O ddiwylliant ac arfordir i fwyd, pêl-droed a cherddoriaeth, dyma’r pethau sy’n gwneud y ddinas mor fythgofiadwy.

Mae cyrraedd yno nawr yn haws nag erioed, gyda gwasanaethau trên uniongyrchol newydd o Landudno i orsaf Liverpool Lime Street, sy’n golygu y gallwch chi ddechrau cynllunio eich taith heddiw.

Ble mae Lerpwl?

Mae Lerpwl yn ddinas ar lan y dŵr yng Ngogledd Orllewin Lloegr, ar lannau Afon Merswy. Tua 35 milltir i’r gorllewin o Fanceinion ac yn hygyrch iawn o Ogledd Cymru a thu hwnt, mae’n un o gyrchfannau mwyaf poblogaidd y DU ar gyfer digwyddiadau diwylliannol, cerddoriaeth fyw, siopa a chwaraeon.

Gyda gwasanaethau trên uniongyrchol o gyrchfannau ledled Cymru, gan gynnwys ein llwybr uniongyrchol o Landudno i orsaf Liverpool Lime Street, mae teithio i Lerpwl yn haws nag erioed.

Pam ymweld â Lerpwl?

Mae gan Lerpwl hanes morwrol cyfoethog, sîn gerddoriaeth sy’n enwog ar draws y byd, a mwy o amgueddfeydd ac orielau nag unrhyw ddinas yn y DU y tu allan i Lundain. P’un a ydych chi’n archwilio’r glannau hanesyddol, yn darganfod stori’r Beatles neu’n treulio’r prynhawn yn siopa yn Liverpool ONE, mae rhywbeth at ddant pawb yno.

Mae’r ddinas yn enwog am ei hawyrgylch croesawgar, ei sîn fwyd lewyrchus a’i chalendr llawn digwyddiadau chwaraeon a diwylliannol, sy’n golygu ei bod yn ddewis gwych ar gyfer unrhyw arhosiad.

Teithio i Lerpwl ar drên

Mae teithio ar drên yn ei gwneud hi’n hawdd archwilio Lerpwl, gyda gorsaf Lime Street o fewn taith gerdded fer i lawer o atyniadau, ardaloedd siopa a thirnodau diwylliannol mwyaf adnabyddus y ddinas.

Cyn i chi deithio, defnyddiwch ein cynllunydd teithiau i wirio amseroedd trenau byw a phrynu tocynnau Advance ar ein gwefan neu ap i sicrhau ein prisiau rhataf gan osgoi ffioedd archebu.

Mae rhai o’n llwybrau mwyaf poblogaidd yn cynnwys:

Crwydro Lerpwl

Diwylliant a hanes

Dewch i ddarganfod y stori y tu ôl i Adar Liver enwog Lerpwl ar Daith 360 Adeilad y Royal Liver, archwiliwch amgueddfeydd ac orielau niferus y ddinas (gan gynnwys Amgueddfa Lerpwl) neu ewch i Eglwys Gadeiriol Lerpwl, yr eglwys gadeiriol fwyaf ym Mhrydain. Ni fydd dilynwyr y Beatles eisiau methu The Beatles Story, lle gallwch ymgolli yn hanes y band, gan fanteisio hefyd ar y gostyngiad 10% oddi ar docynnau oedolion os ydych chi wedi teithio i’r ddinas ar y trên.

Chwaraeon a phrofiadau

Ewch y tu ôl i’r llenni yn Anfield neu Stadiwm Hill Dickinson, cartref newydd Everton, neu fwynhau golygfeydd anhygoel o nenlinell y ddinas ar y Mersey Ferry River Explorer Cruise. Os oes plant yn eich parti teithio, mae Parc Saffari Knowsley yn ddiwrnod allan gwych i’r teulu cyfan.

Siopa

O frandiau dylunwyr a ffefrynnau’r stryd fawr yn Liverpool ONE i fusnesau sy’n cael eu rhedeg yn annibynnol ledled y ddinas, mae rhywbeth at ddant pob siopwr yn Lerpwl.

Bwyd a diod

P’un ai a ydych chi’n chwilio am gaffis, bwytai arobryn neu dafarndai traddodiadol, mae gan Lerpwl ddigon o ddewis. Mae Castle Street a Bold Street yn ffefrynnau i bobl sy’n hoff o fwyd, ac mae’r Royal Albert Dock yn cynnig bwytai a bariau sy’n edrych dros ardal y glannau. Beth am roi cynnig ar bowlen o Lobsgóws traddodiadol, sef stiw blasus sy’n enwog o amgylch y byd.

Cerddoriaeth a bywyd nos

Mae treftadaeth gerddorol Lerpwl yn fyd-enwog. Ewch i’r Cavern Club, gwyliwch sioe yn yr M&S Bank Arena neu dewch o hyd i artistiaid newydd mewn lleoliadau sy’n cynnwys y Future Yard a’r Invisible Wind Factory. Mae gan y ddinas bopeth, o gigiau personol i gyngherddau mawr, sy’n golygu bod cerddoriaeth fyw ar gael drwy gydol y flwyddyn.