Arolwg Teithio Cenedlaethol Cymru - Penderfyniadau: Ar ôl dadansoddi Peilot 1

Argymhelliad NatCen: Cadw’r cyfnod galw’n ôl o ddau ddiwrnod a lleihau lefel y manylion a gesglir

Penderfyniad TrC/Llywodraeth Cymru: Wedi derbyn

Rhesymeg:

• Byddai newid i ddyddiadur teithio undydd yn gofyn am gynnydd sylweddol ym maint sampl blynyddol WNTS, ac felly costau, er mwyn cadw’r un lefel o fanylder disgwyliedig.
• Mae’r dyddiadur teithio a ddefnyddir mewn profion meintiol wedi cael ei adolygu a’i symleiddio i leihau’r baich cofnodi data i ymatebwyr.
• Mae rhagor o welliannau i’r dyddiadur teithio yn cael eu datblygu i’w wneud yn fwy ymarferol cyn y prif lansiad.

Argymhelliad NatCen: Cynllun dyddiadur rhyngddalennog sy’n hwyrach ymlaen yn y broses (ar ôl yr holiadur)

Penderfyniad TrC/Llywodraeth Cymru: Wedi derbyn

Rhesymeg:

• Roedd cyfradd gadael yr ymatebwyr yn is pan oedd y dyddiadur yn hwyrach ymlaen yn y broses.
• Mae darparu’r dyddiadur yn hwyrach ymlaen yn y broses yn fwy priodol wyneb yn wyneb oherwydd prosesau gwaith maes, fel cysylltu â’r rhyngrwyd a symud gliniadur rhwng y gweithiwr maes a’r ymatebydd.
• Roedd dyddiaduron rhestredig a dyddiaduron rhyngddalennog wedi rhestru nifer debyg o deithiau pan oeddent yn hwyrach ymlaen yn y broses.
• Mae’r dyddiadur rhyngddalennog yn cael ei ystyried yn fwy sgyrsiol ac yn llai o faich i ymatebwyr.

Byddwn yn monitro perfformiad y dyddiadur teithio yn ofalus ac yn ystyried ffyrdd o leihau baich yr ymatebwyr ymhellach. Bydd hyn yn cael ei ddefnyddio fel sail ar gyfer datblygu unrhyw ddyddiaduron teithio yn y dyfodol.

Argymhelliad NatCen: Dull “hyd at ddau oedolyn”

Penderfyniad TrC/Llywodraeth Cymru: Wedi derbyn

Rhesymeg:

• O’i gymharu â data Cyfrifiad 2021, nid oedd y dull dewis ar hap a brofwyd yn cynhyrchu sampl llawer mwy cynrychioladol. Roedd hyn yn awgrymu lefelau o ddiffyg cydymffurfio.
• Roedd y dull “hyd at ddau oedolyn” wedi arwain at sampl cynhyrchiol mwy.
• Mae’r dull “hyd at ddau oedolyn” yn symlach ac yn darparu gwell gwerth am arian. 

Bydd proffil demograffig yr ymatebwyr yn cael ei fonitro dros amser i brofi a yw’r canfyddiadau hyn yn dal yn ddibynadwy. Byddwn yn adolygu’r meini prawf dewis ymatebwyr fesul cartref dros amser.

Argymhelliad NatCen: Datblygu a phrofi sgriniau crynodeb y gellir eu golygu i newid manylion teithiau

Penderfyniad TrC/Llywodraeth Cymru: Wedi gwrthod

Rhesymeg:

• Isel iawn oedd nifer y gwallau a gofnodwyd, gyda’r rhan fwyaf yn codi mewn dyddiaduron teithio rhestredig. Mae maint y gwaith datblygu i gyflwyno sgriniau crynodeb yn drech na’r manteision posibl.
• Oherwydd trefn y cwestiynau, mae’r broses o gywiro gwallau yn symlach ar gyfer y dyddiaduron rhyngddalennog. Felly, mae sgriniau crynodeb yn ychwanegu at faich yr ymatebydd.
• Mae’r cwestiynau yn y dyddiadur teithio wedi cael eu mireinio ymhellach, gan dargedu ffynhonnell gwallau’r ymatebwyr.

Bydd yr eitem hon yn parhau i gael ei hadolygu, a byddwn yn ailedrych ar y penderfyniad hwn dros amser.

Argymhelliad NatCen: Defnyddio codau bras ar gyfer lleoliadau amwys, profi sicrwydd preifatrwydd, a mewnbynnu lleoliadau hysbys yn awtomatig (h.y. cartref)

Penderfyniad TrC/Llywodraeth Cymru: Wedi’i derbyn fel eitem ddatblygu yn y tymor hir

Rhesymeg:

• Bydd gwella’r codio ar gyfer lleoliadau amwys, a mewnbynnu lleoliadau hysbys (h.y. cartref) yn gwella cywirdeb y data a geir.
• Bydd datblygu defnyddioldeb mapiau yn broses ailadroddol, ochr yn ochr â chodio unrhyw gyfweliadau dros y ffôn a llenwi dyddiaduron teithio all-lein.