Panel Hygyrchedd

Mae Alex yn berson ifanc sy’n defnyddio cadair olwyn ac yn cynrychioli Cymru ar Bwyllgor Ieuenctid yr elusen ‘Whizz Kidz’. Mae'n aml yn defnyddio'r rhwydwaith trafnidiaeth gyhoeddus yn annibynnol gyda'i gi cymorth gan nad yw'n gallu gyrru oherwydd ei iechyd. Ganddo brofiad uniongyrchol o'r pwysigrwydd sydd gan hygyrchedd ar bob trafnidiaeth gyhoeddus i bobl ifanc sy’n defnyddio cadair olwyn. Gan ei fod hefyd yn niwroamrywiol, mae'n gobeithio y gall ddod â'i brofiad eang i sicrhau bod lleisiau pobl ifanc niwroamrywiol yng Nghymru yn cael eu clywed.

Oes yna fater penodol rydych chi am hyrwyddo ar y panel?

Hoffwn ddefnyddio fy mhrofiadau i sicrhau bod defnyddwyr cadair olwyn ifanc yn teimlo'r un mor hyderus â'u cyfoedion abl wrth ddefnyddio'r rhwydwaith trafnidiaeth.

Mae Alun yn ymgyrchydd sefydledig dros hawliau, ar ôl gweithio mewn swyddi uchel yn y Comisiwn Hawliau Anabledd, y Comisiwn Cydraddoldeb a Hawliau Dynol, a swyddfa'r Comisiynydd Pobl Hŷn. Cyn gweithio yn y swyddi hyn, roedd Alun yn Swyddog Seneddol i’r RNIB. Mae Alun yn rhannol ddall. Ar hyn o bryd, mae’n ofalwr i bartner hŷn sydd ag amryw o namau corfforol ac iechyd meddwl. Mae’r ddau ohonynt yn teithio ar drên yn gyson.

Rwy'n cynnig fy ngwybodaeth ymarferol o gyfreithiau cydraddoldeb, a’r gwaith cymhwyso ymarferol i Drafnidiaeth Cymru, gan gynnwys rhyngweithio â rhwymedigaethau iaith Gymraeg.

A oes yna fater penodol rydych chi eisiau mynd i’r afael ag ef ar y panel?

Rwyf eisiau helpu gwreiddio asesiad o effeithiau cydraddoldeb anabledd i’r broses o wneud penderfyniadau o ddydd i ddydd.

Mae Amanda yn teithio ar drafnidiaeth gyhoeddus yn aml, ac mae’n defnyddio’r trên sawl gwaith yr wythnos er mwyn cyrraedd cyfarfodydd ac ar gyfer dibenion hamdden. Mae hi’n gwirfoddoli fel hyfforddwr Riding for the Disabled, gan weithio ag oedolion a phlant sydd â gwahanol anableddau, gan arbenigo mewn addysgu dressage. Mae Amanda hefyd yn gwirfoddoli fel Parch Rheilffordd, sef cynllun sy’n cynnwys gwirfoddolwyr hyfforddedig o eglwysi lleol, sy'n cadw llygad ar bobl fregus sy’n teithio ar y rheilffyrdd, ac yn rhoi cymorth iddynt. Mae hi’n cipio pob cyfle i hyrwyddo hawliau pobl anabl, ac i gynrychioli eu hanghenion.

Rwyf eisiau cyfrannu fy mhrofiadau fel teithiwr sy’n defnyddio cadair olwyn er mwyn gwella’r profiad o deithio ar y trên, gan gynnwys cymorth i archebu, a chymorth wrth adael yr orsaf.

Mae Andrea’n byw yn Abertawe, ac mae hi’n rheoli tîm ymgysylltu Cŵn Tywys Cymru. Mae hi’n aelod o Banel Hygyrchedd Trafnidiaeth, sydd wedi bod yn rhan bwysig iawn o ddatblygu nodau hygyrchedd trafnidiaeth Llywodraeth Cymru. Mae Andrea yn aml yn ymgyrchu dros gynhwysiant pobl anabl ym mhob agwedd o fywyd, ac fel perchennog ar gi tywys ei hun, mae ganddi ddiddordeb mewn cynhwysiant y bobl sydd wedi colli eu golwg. Mae ei swydd yn cynnwys dylanwadu ar wneuthurwyr polisi ar lefel strategol, sy'n gofyn am wybodaeth dechnegol gadarn o arfer cynhwysol yn yr amgylchedd adeiledig ac o gymhwyso deddfwriaeth cydraddoldeb. Andrea yw Cadeirydd Vision Impaired West Glamorgan, sef elusen sy’n cynrychioli barn a phryderon pobl sydd wedi colli eu golwg yn Abertawe. Mae hyn yn golygu dylanwadu ar seilwaith a strategaeth trafnidiaeth leol, sy’n gofyn am ddealltwriaeth o gynllunio trafnidiaeth leol, yn ogystal â thrafnidiaeth ryngwladol.

Rwy’n ddefnyddiwr annibynnol cyson o wasanaethau’r rheilffordd, ac rwy’n teimlo’n angerddol am sicrhau eu bod nhw’n hygyrch ac yn gynhwysol.

A oes yna fater penodol rydych chi eisiau mynd i’r afael ag ef ar y panel?

Mae trafnidiaeth sy’n hygyrch ac sy’n gynhwysol yn hanfodol i bobl sydd wedi colli eu golwg, gan gynnwys cyhoeddiadau clyweledol mewn gorsafoedd ac ar bob trên.

Mae Emily Nash yn teimlo'n angerddol am wella trafnidiaeth gyhoeddus ar gyfer pobl ag anableddau. Mae'n ymchwilydd ôl-raddedig ym Mhrifysgol Coventry, a ganddi ddiddordeb yn yr heriau sy'n wynebu teithwyr sydd yn colli eu golwg a sut y gall gwybodaeth sy'n berthnasol ac yn hygyrch gefnogi teithio annibynnol a hyderus ymysg y grŵp hwn. Ganddi nam difrifol ar ei golwg ac mae'n byw yn ne Cymru. Mae ganddi ddau o blant gyda'r un cyflwr llygaid.

Oes yna fater penodol rydych chi am hyrwyddo ar y panel?

Rwy'n awyddus i hyrwyddo a chefnogi mynediad at drafnidiaeth gyhoeddus ar gyfer plant a phobl ifanc.

Mae Eric yn hunan-eiriolwr awtistiaeth yn yr Adran Iechyd a Gofal Cymdeithasol, gan weithio ar draws y llywodraeth ar y strategaeth awtistiaeth genedlaethol yn Lloegr. Mae Eric wedi cael diagnosis o Syndrom Asperger, Dyspracsia ac o ADHD, ac mae wedi eirioli ar ran y namau cudd hyn, ac wedi cydarwain ‘Autonomy’, sef grŵp cymdeithasol hunan-gymorth dros y 15 mlynedd ddiwethaf i oedolion ag awtistiaeth. Yn ei amser hamdden, mae Eric yn ysgrifennu ac yn recordio cerddoriaeth dan yr enw ‘E.L. Heath’ (roedd ei albwm Gymraeg ‘Tŷ’ yn ‘albwm yr wythnos’ ar BBC Radio Cymru yn 2013). Mae hefyd yn chwarae criced, a bu’n cynrychioli’r Llewod Anableddau Dysgu Lloegr, tîm Anableddau Dysgu Swydd Amwythig am 18 mlynedd, a’i glwb lleol Knockin a Kinnerley. Mae Eric yn byw gyda’i bartner Victoria yng nghefn gwlad canolbarth Cymru wrth droed bryn uchel.

Gan fy mod yn byw yng nghanolbarth Cymru, rwy’n awyddus i helpu i wella fy ngwasanaeth rheilffordd lleol, sy’n gyswllt hanfodol y mae llawer o bobl yn dibynnu arno. Mae gen i ddiddordeb mewn trafnidiaeth, a hygyrchedd erioed.

A oes yna fater penodol rydych chi eisiau mynd i’r afael ag ef ar y panel?

Fel rhywun sydd â namau cudd, rwy’n awyddus i wella hygyrchedd mewn meysydd sy’n llai amlwg, ac ar gyfer cyflyrau sy’n llai gweledol, â’r nod o wella hygyrchedd i bawb. Mae meysydd fel canfyddiad a chyfathrebu yn gallu bod yn rhwystrau mawr os nad oes rhywun yn mynd i’r afael ag ef, ac mae’r defnydd cynyddol o dechnoleg i helpu pobl i ddefnyddio ein rhwydwaith gymhleth o reilffyrdd yn hanfodol er mwyn cynorthwyo â chynllunio a chwblhau taith. Gall y meysydd hyn helpu i wella hyder ac annibyniaeth, os yw’n cael ei wneud yn hygyrch i bawb.

Mae Glyn o Gwmbrân, yn Fyddar ddefnyddiwr Iaith Arwyddion Prydain. Mae'n ddefnyddiwr aml a brwd o’r rheilffyrdd, gydag angerdd hirsefydlog i gyd-fynd gyda hynny. Ymunodd â'r panel er mwyn rhannu ei brofiadau personol o'r rhwystrau i berson Byddar sydd am ddefnyddio'r rheilffyrdd, ac mae'n awyddus i eirioli ar ran yr holl bobl fyddar. O ystyried y datblygiadau technolegol sydd gennym nawr, mae'n credu bod gennym y gallu i wella mynediad i bawb.

Oes yna fater penodol rydych chi am hyrwyddo ar y panel?

Hoffwn sicrhau bod gan bob trên a phob gorsaf wybodaeth hygyrch ar gyfer defnyddwyr Iaith Arwyddion Prydain a phobl Fyddar yn benodol.

Mae Hannah yn diwtor awtistig sy'n hwyluso dosbarthiadau ysgrifennu creadigol i oedolion ag anableddau. Mae hi hefyd yn gwirfoddoli ac yn Ymddiriedolwr i Barry Pride, gan weithio fel cydlynydd Amrywiaeth, Cydraddoldeb a Chynhwysiant. Rhestrwyd Hannah ar restr ‘Pinc List 2025’ am ei gwaith i Pride ac o fewn y gymuned LHDTCRhA (Lesbiaidd, Hoyw, Deurywiol, Trawsryweddol, Cwiar, Rhyngryweddol ac Arywiol, ac am greu mannau diogel a chynhwysol ar gyfer y celfyddydau. Mae Hannah yn byw gyda chyflyrau iechyd cronig eraill sy'n effeithio ar ei gweithgareddau o ddydd i ddydd, ac mae'n cefnogi aelodau o'r teulu sydd â phroblemau symudedd hefyd, gan roi sbectrwm eang o brofiadau o anghenion mynediad.

Oes yna fater penodol rydych chi am hyrwyddo ar y panel?

Ar ôl cael diagnosis o agoraffobia oherwydd gorlethu synhwyraidd, hoffwn sicrhau bod trafnidiaeth gyhoeddus yn hygyrch i ddefnyddwyr niwroamrywiol.

Mae Joshua Reeves yn ymgynghorydd hawliau anabledd yng Nghymru ac entrepreneur cymdeithasol sydd â hanes cryf o ddylanwadu ar hygyrchedd a chynhwysiant yn nhrafnidiaeth a gwasanaethau cyhoeddus. Mae'n Sylfaenydd a Phrif Weithredwr Cwmni Buddiannau Cymunedol ‘Reeves Disability Consultancy’ ac yn Gadeirydd ‘Don't Call Me Special’, gan ddarparu arweinyddiaeth strategol ar gynhwysiant anabledd, polisi hygyrchedd, a newid systemau dan arweiniad profiad byw.

Gan Joshua arbenigedd proffesiynol a phrofiad byw helaeth mewn cyd-gynhyrchu, addasiadau rhesymol, ac atebolrwydd. Mae Joshua wedi gweithio gyda sefydliadau a chyrff cyhoeddus i droi polisi yn welliannau ymarferol, gweithredol sy'n gwella profiadau teithwyr anabl yn y byd go iawn. Cydnabuwyd ei ymagwedd foesol, ei gefnogaeth o welliannau ystyrlon yn hygyrchedd a arweiniwyd gan dystiolaeth, a’i allu i herio syniadau mewn modd cadarnhaol.

Derbyniodd Joshua Medal yr Ymerodraeth Brydeinig [BEM] am ei wasanaeth i gynhwysiant ac eiriolaeth anabledd.

Wedi'i geni a'i magu yn Ynys Môn, deffrodd diddordeb Judi mewn trenau pan oedd hi'n dair oed pan aeth i'r orsaf drenau lleol yn Rhosneigr er mwyn gwylio'r trenau stêm. Trwy gydol ei gyrfaoedd yn y Llynges Frenhinol, gwasanaethau plant Cyngor Sir Caerloyw ac mewn ymgynghori, mae hi bob amser wedi bod â diddordeb mewn materion cydraddoldeb ac amrywiaeth. Ymhlith cyfranogiadau eraill yn ei hamser hamdden, roedd hi'n aelod etholedig o fwrdd ei hymddiriedolaeth ysbyty lleol, lle arweiniodd adolygiad o’u hyfforddiant cydraddoldeb ac amrywiaeth. Un o'i haseiniadau fel ymgynghorydd rheoli oedd yn Network Rail, lle gweithiodd hi ar reoli risg croesfannau.

Oes yna fater penodol rydych chi am hyrwyddo ar y panel?

Hoffwn ymestyn fy mhrofiad i'r rhaglen Cledrau’n Croesi nawr bod fy ngolwg yn dirywio'n sylweddol, sydd wedi ysgogi mwy o ddibynadwyedd ar wasanaethau rheilffyrdd yn gyffredinol.

Mae Kat yn defnyddio cadair olwyn drydan yn feunyddiol, ac yn teithio ar drafnidiaeth gyhoeddus a phreifat yn rheolaidd. Mae hi'n gweithio i Anabledd Cymru, ac yn ymgyrchu ar ran pobl anabl yn ei hamser ei hun. Yn y gorffennol, mae hi wedi ymwneud â newid rheolau trwyddedu tacsis yn Abertawe. Mae hi hefyd wedi ysgrifennu blogiau teithio, gan gynnwys un am ei thaith i Gwpan Rygbi'r Byd yn Ffrainc.

Ganddi gi cymorth o'r enw Purdey i godi ei hyder pan mae hi’n gadael y tŷ. Fodd bynnag, ers i Purdey ymuno gyda hi, mae teithio yn anos fyth; mae’n anodd i bob deall na ddylen nhw gymryd sylw’r ci, ac mae hi wedi clywed sawl sylw rhagfarnllyd. Er, yn bennaf mae pobl yn cael eu swyno ganddi.

A oes mater penodol yr hoffech ei hyrwyddo ar y panel?

Fel rhywun sy’n defnyddio cadair olwyn drydanol, rwy'n ymgyrchu i wneud teithio gyda chŵn cymorth yn haws.

Mae Kirsty yn Swyddog Ymgyrchoedd RNIB Cymru. Mae hi’n cefnogi pobl ddall a rhannol ddall â materion ymgyrchu lleol a chenedlaethol, fel trafnidiaeth, mannau a rennir, a gwybodaeth hygyrch. Mae Kirsty’n gwirfoddoli i ddwy elusen sy’n ymwneud â cholli golwg, sef Look UK ac Esme’s Umbrella, er mwyn helpu eraill i oresgyn rhwystrau maent yn eu hwynebu. Mae hi’n aelod o sawl grŵp llywio’r bwrdd iechyd, Grwpiau Mynediad y Cyngor ac o Banel Hygyrchedd ITV. Mae Kirsty wedi bod yn teithio’n annibynnol ar y rheilffyrdd ers 13 mlynedd bellach gyda nam ar ei golwg.

Gan weithio i’r RNIB, ac fel aelod o’r panel, rwy’n gobeithio y byddaf yn gallu helpu ein sefydliadau i gydweithio mewn ffordd strategol.

Mae Margaret yn gyn-filwr dall, ac mae ganddi nam clyw niwrolegol. Mae hi’n llysgennad Deafblind UK a Blind Veterans yn ne Cymru. Margaret yw cadeirydd gwirfoddol Grŵp lleol Abertawe, Castell-nedd a Phort Talbot. Mae hi’n credu yn yr egwyddor o deithio cyfartal - cydraddoldeb mynediad daearyddol, a bod teithio’n hawdd i bob aelod o gymdeithas, dim ots beth yw eu gallu/anabledd.

Fy mhrif nod ar y panel yw dadlau ‘nad yw anabledd yn ddaearyddol’.

A oes yna fater penodol rydych chi eisiau mynd i’r afael ag ef ar y panel?

Rwyf wir eisiau gweld cydraddoldeb wrth deithio ar fws a thrên ar draws Cymru, a’r DU yn gyffredinol.

Roedd Margaret Everson MBE yn Gyfarwyddwr ‘Bus Users Cymru,’ ble yr oedd yn delio â materion strategaeth a pholisi yn ogystal â phrydlondeb a dibynadwyedd bysiau. Wedi gadael yno yn 2018, parhaodd Margaret yn y maes trafnidiaeth gyhoeddus fel Rheolydd Cyffredinol gwasanaeth bysiau a choetsys pellter-hir TrawsCymru ar ran Llywodraeth Cymru tan 2021.  Mae hi wedi gweithio yn y maes trafnidiaeth gyhoeddus ers 1977, ac mae'n Gymrawd o'r Sefydliad Siartredig Logisteg a Thrafnidiaeth. Mae ganddi hefyd Dystysgrif Cymhwysedd Proffesiynol mewn Gweithrediadau Cenedlaethol a Rhyngwladol Cerbydau Gwasanaeth Cyhoeddus.

Penodwyd Margaret yn MBE yn ystod Anrhydeddau Pen-blwydd y Frenhines 2013 am wasanaethau i ddefnyddwyr bysiau a thrafnidiaeth yng Nghymru. Ymunodd â'r panel oherwydd ei diddordeb mewn darparu gwybodaeth a symudedd o ran gorsafoedd rheilffordd, yn ogystal â'r profiad teithio o ddrws-i-ddrws i bobl hŷn a phob ag anawsterau symudedd.

A oes mater penodol rydych chi am ei hyrwyddo ar y panel?

Y ffordd y cyflwynir gwybodaeth hanfodol - mae angen yr uchder cywir, a ffont digon mawr i bawb allu ei darllen.

Mae Mark wedi mynegi diddordeb brwd mewn teithio ers ei ieuenctid, gan dreulio oriau di-ri yn teithio gogledd Cymru ar fws a thrên pan yn ei arddegau. Mae Mark yn gwirfoddoli fel Llysgennad Teithio ar gyfer Ffrindiau Gigiau - prosiect sy'n cael ei reoli gan Anableddau Dysgu Cymru. Gan Mark anabledd corfforol, anabledd dysgu, ac mae nam ar ei olwg. Mae hefyd yn cefnogi ei bartner sydd ag anabledd dysgu ac sydd wedi'i gofrestru'n ddall. Gan Mark brofiad o ran hygyrchedd a gwasanaethau gwybodaeth. Mae Mark yn siarad Cymraeg a Saesneg, ac wedi bod yn aelod o'r panel ers y cychwyn cyntaf.

Ymunodd â'r panel hygyrchedd a chynhwysiant i sicrhau bod llais pawb yn cael ei glywed, waeth beth fo'u hanabledd.

A oes mater penodol rydych chi am ei hyrwyddo ar y panel?

Hoffwn sicrhau bod gan bob trên a phob gorsaf wybodaeth hygyrch ar gael mewn fformat y gellir ei ddeall gan bawb.

Fy enw i yw Rachel Jones ac rwy’n deithiwr trên brwd. Cefais fy ngeni â nam ar y golwg o'r enw Retinitis Pigmentosa ac nid oeddwn byth yn gallu dysgu gyrru, felly defnyddio trenau yw'r brif ffordd yr wyf yn teimlo y gallaf fod yn annibynnol. Bûm yn byw ar reilffordd Calon Cymru am y rhan fwyaf o’m hoes, ac yn awr yn byw ar reilffordd y Cambrian, ac felly mae fy angerdd yn eiriol dros well cysylltiadau trafnidiaeth wledig yn ogystal â gwell hygyrchedd ar drenau ac mewn gorsafoedd. Rwy’n gweithio i RNIB Cymru, yr elusen colli golwg, ac yn ymgyrchu am well ymwybyddiaeth a dealltwriaeth o golli golwg yn ogystal â newid cymdeithasol i chwalu’r rhwystrau sy’n wynebu pobl ddall a rhannol ddall.

Mae Robert yn dod o Landudno, gogledd Cymru. Mae wedi cael diagnosis o Syndrom Asperger, ac mae’n byw ag ystod o broblemau iechyd a thrafferthion cysylltiedig, gan gynnwys gorbryder, dyspracsia, a phroblemau corfforol eraill. Mae Robert yn teimlo’n angerddol iawn am ffotograffiaeth (gan arbenigo mewn ffotograffiaeth rheilffyrdd), yn ogystal â cosplay a gwaith modelu. Mae ef wedi bod yn rhan o brosiectau cymunedol y rheilffyrdd Trenau Arriva Cymru (a Thrafnidiaeth Cymru bellach) dros y blynyddoedd diwethaf, gan gynnwys y prosiect Teithiwr Hyderus, ac mae’n hyrwyddo’r cynllun Waled Oren. Mae Robert hefyd yn cynhyrchu ffotograffiaeth ar gyfer tîm cyfryngau Trafnidiaeth Cymru. Mae ef hefyd yn gweithio ar brosiect rhaglen ddogfen ar Awtistiaeth gyda ‘TAPE Community Music and Film’ sydd wedi ei leoli yn yr Hen Golwyn, gogledd Cymru.

Rwyf eisiau gwneud cyfraniad cadarnhaol i’r diwydiant rheilffyrdd a fydd yn galluogi i bobl sydd ag anableddau i allu teithio’n fwy hyderus ac yn fwy cyfforddus.

A oes yna fater penodol rydych chi eisiau mynd i’r afael ag ef ar y panel?

Rwy’n awyddus iawn i dynnu sylw at y trafferthion y mae pobl fel fi sydd ag anableddau cudd yn eu hwynebu. Rydym ni’n llai tebygol o gael cymorth gan staff os oes ganddynt ddiffyg dealltwriaeth o anableddau cudd.

Mae Theodore yn teithio’n aml ac wedi teithio gyda nifer o wasanaethau'r rhwydwaith ehangach er mwyn deall sut y maent yn cynorthwyo teithwyr anabl. O ran adolygu gweithredwyr rheilffyrdd eraill ar draws y rhwydwaith ehangach, mae'n gweithio'n annibynnol. Mae Theodore hefyd yn Fyddar ac yn defnyddio cadair olwyn oherwydd anhwylder niwrolegol.

Oes yna fater penodol rydych chi am hyrwyddo ar y panel?

Ymunais â'r panel i ddod â syniadau a newid a fyddai'n helpu pobl anabl i deithio'n annibynnol, a sicrhau bod y rhai sy'n dibynnu ar drafnidiaeth gyhoeddus yn teimlo bod pob un o’u teithiau yn bwysig.

Mae Tracy yn byw yn Ynys Môn, wedi goroesi strôc a ganddi anabledd dysgu. Buodd hi’n gadeirydd Pobl yn Gyntaf Cymru Gyfan am ddwy flynedd ac mae hi yn parhau i ymwneud yn helaeth â’u gweithgaredd. Mae hi hefyd yn Llysgennad Rhanbarthol ar gyfer 'Electric Umbrella', elusen gerddoriaeth yn Swydd Hertford. Mae Tracy yn teithio'n annibynnol yn rheolaidd i lefydd megis Manceinion a Watford.

Oes yna fater penodol rydych chi am hyrwyddo ar y panel?

Hoffwn helpu pobl ag Anableddau Dysgu sydd yn gweld hi'n anodd myned i drenau yn annibynnol.

Mae diddordeb Trevor mewn materion hygyrchedd wedi datblygu ers iddo gael diagnosis o MS yn 1994. Ef yw cyfarwyddwr Anabledd Cymru, mae’n Ymddiriedolwr See Around Britain, ac fe gafodd ei gontractio i sefydlu ac arwain Grŵp Cynghori Anableddau Canolfan Mileniwm Cymru, yn ystod y gwaith adeiladu a gwaith mewnol yr adeilad. Yn 2018, cafodd Trevor y Fedal Ymerodraeth Brydeinig am ei wasanaeth i bobl anabl yng Nghymru. Mae Trevor yn defnyddio cadair olwyn yn llawn amser, ac mae’n teithio gyda’i Gynorthwyydd Personol / Gweithiwr Cymorth er mwyn rhedeg ei fusnes, ac felly mae hygyrchedd priodol yn bwysig i annibyniaeth Trevor. Mae’r modd y mae’n defnyddio’r ‘model cymdeithasol’ yn allweddol i lwyddiant y panel.

Rwy’n aelod o’r panel er mwyn cynnig fy ngwybodaeth a fy sgiliau er mwyn gwella profiadau teithwyr anabl.

A oes yna fater penodol rydych chi eisiau mynd i’r afael ag ef ar y panel?

Mae busnesau weithiau’n gallu anghofio am brofiad eu cwsmeriaid anabl. Felly, rwyf eisiau canolbwyntio ar brofiad y cwsmer ym mhob agwedd ar deithio ar y trên, gan gynnwys hygyrchedd corfforol, agweddau staff ac ymarferion busnes.