Portmeirion

Wedi'i ddylunio a'i adeiladu gan Syr Clough Williams-Ellis rhwng 1925 a 1976, mae Portmeirion wedi'i leoli yng Ngwynedd, Gogledd Cymru - ond mae ei bensaernïaeth swynol yn ymdebygu i'r Riviera yn yr Eidal. Yn aml, caiff ei ddisgrifio fel man prydferth a rhamantus, mae'n ddiwrnod allan perffaith neu benwythnos i ffwrdd, p'un a yw'n ddim ond y ddau ohonoch chi neu'r teulu cyfan.

Teithio i Bortmeirion ar y trên

Mae'n hawdd cyrraedd Portmeirion ar y trên. Dim ond taith gerdded o filltir o orsaf reilffordd Minffordd ar linell y Cambrian (Aberystwyth/Pwllheli - Amwythig).

Beth am fynnu taith gyda llawer o olygfeydd i'w mwynhau wrth gyrraedd Portmeirion? Treuliwch eich amser yn y pentref yn ymlacio ac yn mwynhau'r golygfeydd, nid yn ceisio dod o hyd i le parcio.

Dod o hyd i amseroedd trenau ac archebu eich tocynnau.

Pam ymweld â Phortmeirion?

Chwilio am ysbrydoliaeth? Rydym wedi cynnwys rhai o'n hoff atyniadau i'ch helpu chi ddod o hyd i bethau i'w gwneud ym Mhortmeirion.

• Y Sgwâr - Roedd pensaer Portmeirion, Syr Clough Williams-Ellis, yn amgylcheddwr brwd a oedd eisiau creu pentref hyfryd heb ddifetha yr amgylchedd o’i gwmpas. Mae ei arddull baróc yn amlwg iawn yn y Sgwâr. Ymhlith yr adeiladau, tai, a gerddi Eidalaidd, dyma leoliad gwych i fynd ar antur a thynnu lluniau, neu ymlacio a mwynhau’r amgylchedd hyfryd.

• Ffair Fwyd a Chrefftau Portmeirion - Dyma ddigwyddiad sy’n dathlu rhai o gynnyrch, bwyd a diod gorau Cymru. Mwynhewch gerddoriaeth fyw, arddangosfeydd coginio, gweithdai, a Groto Nadolig hudolus – yr atyniad perffaith os ydych chi yn y ffair gyda phlant.

• Y Gwyllt - Gwisgwch eich esgidiau cerdded a mynd allan i'r awyr agored. Mae gan y Gwyllt 70 acer o goetir, sy’n gartref i rai o goed mwyaf Prydain, gerddi cudd, blodau prin, a llawer mwy. Dyma'r lle perffaith i fwynhau rhywfaint o harddwch naturiol Cymru.

• Rheilffyrdd Ffestiniog ac Eryri - Beth am deithio y trên stêm i ganol prydferthwch Eryri? Neu, beth am wneud y daith fer ond dymunol i Borthmadog, a mynd ymlaen i Gaernarfon ar hyd Rheilffordd Eryri?

Rhagor o wybodaeth am yr hyn y gallwch ei weld a’i wneud ym Mhortmeirion a’r cyffiniau.

Treulio penwythnos ym Mhortmeirion

• Gwesty Portmeirion - Agorwyd y gwesty trawiadol hwn yn 1926, ac mae golygfeydd hyfryd o Aber Afon Dwyryd i'w gweld oddi yno. Y tu mewn i'r gwesty, mae yna fwyty gosgeiddig, bar, a theras, yn ogystal â llawer o lolfeydd braf wedi’u haddurno yn arddull Williams-Ellis.

• Castell Deudraeth - Wedi’i leoli y tu allan i’r pentref, roedd y plasty hwn yn arfer bod yn gartref i AS yn ystod blynyddoedd cynnar yr Oes Fictoria, ond mae bellach wedi cael ei adnewyddu’n westy moethus. Ewch am dro o gwmpas y gerddi, a mwynhau'r gwaith pensaernïol anhygoel. Os ydych chi wedi gwylio’r gyfres deledu 'The Prisoner' , mae’n debygol y byddwch chi’n gyfarwydd â rhai o'r lleoliadau o gwmpas y pentref, gan mai dyma lle cafodd y gyfres ei ffilmio.

Rhagor o wybodaeth am y gwahanol fathau o lety sydd ar gael ym Mhortmeirion.