Cardiff Bay

Mae Caerdydd, prifddinas Cymru, yn hawdd ei chyrraedd ar y trên ac mae llawer i’w weld a’i wneud yno. Ond rydyn ni’n gwybod bod costau'n gallu pentyrru. Felly rydym wedi gwneud rhestr o’n hoff bethau i’w gwneud yng Nghaerdydd yn rhad ac am ddim. O amgueddfeydd a hanes i barciau a gweithgareddau awyr agored, dyma’r pethau gorau i’w gwneud yng Nghaerdydd na fyddant yn gwagio'r banc.

 

Y pethau gorau i’w gwneud am ddim yng Nghaerdydd, Cymru

Dyma ein hoff atyniadau rhad ac am ddim yng Nghaerdydd, sy’n berffaith p’un a ydych chi’n byw yno neu’n ymweld.

Amgueddfa Werin Cymru Sain Ffagan

Mae gan Amgueddfa Werin Cymru Sain Ffagan ddull unigryw o gyfleu hanes. Gyda thros 40 o adeiladau hanesyddol Cymreig o ganrifoedd yn ôl wedi’u hadleoli a’u hail-godi, yng ngerddi hardd Castell Sain Ffagan. O bentrefi’r Oes Haearn i dafarn Fictoraidd, y ‘cartrefi drwy’r oesoedd’ eiconig, melinau dŵr sy'n gweithio a hyd yn oed becws. Mae parc gwych i blant yno hefyd.

Maenordy Elisabethaidd rhestredig Gradd I yng Nghastell Sain Ffagan yn dyddio o ddiwedd y 1500au. Mae wedi gweld llawer o newidiadau dros y blynyddoedd. Ar un adeg roedd yn gartref i Iarll Plymouth, yr Arglwydd Windsor, a daeth yn ysbyty i filwyr wedi’u hanafu, gyda 40 gwely yn meddiannu’r neuadd wledda.

Mae mynediad i Sain Ffagan yn rhad ac am ddim ond mae parcio’n costio £7 y dydd. Byddem yn argymell y bws, gan fod rhai gwasanaethau’n stopio yn y maes parcio. Gallwch gynllunio eich taith drwy ddefnyddio gwefan Traveline Cymru neu drwy ffonio eu llinell gymorth ar 08004 640 000.

 

Canolfan Gelfyddydau’r Eglwys Norwyaidd

Wedi’i lleoli ym Mae Caerdydd, roedd Canolfan Gelfyddydau eiconig yr Eglwys Norwyaidd yn wreiddiol yn ganolfan addoli ar gyfer morwyr Sgandinafaidd a’u cymuned. Ganed yr awdur llyfrau plant enwog Roald Dahl i rieni Norwyaidd yng Nghaerdydd a chafodd ef a’i chwiorydd eu bedyddio yn yr eglwys.

Heddiw, yr eglwys yw canolbwynt diwylliannol Bae Caerdydd, gydag orielau ac arddangosfeydd yn arddangos artistiaid lleol mewn amrywiaeth eang o gyfryngau. Gan gynnal ei chysylltiad agos â Dahl, cynhelir dathliad blynyddol o’i waith. Mae yno hefyd le chwarae i blant a chaffi.

Y trên yw’r ffordd hawsaf o ymweld, gyda gorsaf Bae Caerdydd 10 munud i ffwrdd ar droed.

 

Tir Castell Caerdydd

Mae Castell Caerdydd yng nghanol y ddinas, gan gyfuno’r gorffennol a’r presennol mewn ffordd unigryw. Mae'r safle bron yn 2,000 o flynyddoedd oed, ac mae yno adfeilion Rhufeinig, gorthwr Normanaidd a phlasty Gothig Fictoraidd gyda gerddi hardd.

Er bod yn rhaid i chi dalu i fynd i mewn i’r castell ei hun, gallwch gerdded o amgylch y tir am ddim. Archwiliwch y sgwâr cyhoeddus, ymwelwch â’r siop anrhegion a’r caffi neu mwynhewch bicnic.

Mae Castell Caerdydd tua 10 munud ar droed o orsaf Caerdydd Canolog a Chaerdydd Heol y Frenhines. Mae gwasanaethau bws lleol hefyd yn stopio y tu allan i’r gât.

 

Parc Bute

Wrth ymyl Castell Caerdydd mae Parc Bute a’r Goedardd. Mae’r parc rhestredig Gradd I yn llawn bioamrywiaeth unigryw, o goed a phlanhigion i anifeiliaid. Mae nifer o lwybrau, canolfan ymwelwyr a chaffis i chi ymlacio a mwynhau paned.

Mae Parc Bute hefyd yn gartref i ddigwyddiadau tymhorol. O deithiau cerdded a rasys yn ystod y misoedd cynhesach i hwyl arswydus ar gyfer Calan Gaeaf a dathliadau Nadoligaidd.

Fel y castell, byddem yn argymell mynd ar drên neu fws. Mae Parc Bute tua 10 munud ar droed o orsaf Caerdydd Canolog a Chaerdydd Heol y Frenhines. Mae gwasanaethau bws lleol yn stopio wrth ymyl y parc.

 

Amgueddfa Genedlaethol Caerdydd

Mae Amgueddfa Genedlaethol Caerdydd yn gartref i gelf, hanes a gwyddoniaeth o’r radd flaenaf. Mae’n cynnal arddangosfeydd anhygoel o Gymru a ledled y byd, gyda gwaith celf gan bobl fel Van Gogh, Monet, Turner a mwy. Mae hanes naturiol anhygoel yno hefyd, o anifeiliaid i’r gofod.

Mae mynediad am ddim a gallwch archebu tocyn am ddim ymlaen llaw, er bod mynediad ar y diwrnod ar gael hefyd.

Y trên yw’r ffordd hawsaf o gyrraedd yr amgueddfa. Dim ond 10 munud mae’n ei gymryd i gerdded yno o orsaf Cathays.

 

Parc y Rhath

Parc llai adnabyddus yng Nghaerdydd sy’n werth ymweld ag ef yw Parc y Rhath. Mae’n barc hanesyddol eang gyda llyn cychod 30 erw enfawr gyda’i oleudy ei hun.

Mae’r parc hefyd yn cynnwys gardd wyllt, gardd fotaneg, cyfleusterau chwaraeon a man chwarae i blant.

Y gorsafoedd agosaf yw Lefel Uchel y Mynydd Bychan a Lefel Isel y Mynydd Bychan, ac mae'r ddwy tua 20 munud ar droed o’r parc. Mae digon o fysiau’n stopio yn y parc hefyd.

 

Llwybrau cerdded Caerdydd

Mae Caerdydd bron wedi cael ei chreu i grwydro ar droed, gyda llawer o lwybrau hyfryd yn y ddinas a’r ardal gyfagos.

Dyma rai o’n ffefrynnau:

  • Llwybr Bae Caerdydd - taith gerdded chwe milltir o amgylch y bae o’r Morglawdd i’r Eglwys Norwyaidd.
  • Llwybr Taf - cerddwch ar hyd Afon Taf o ganol y ddinas, drwy Barc Bute cyn belled ag y dymunwch i’r gogledd neu’r de o’r ddinas.
  • Llwybr Arfordir Cymru - mwynhewch ran Caerdydd o Lwybr yr Arfordir o orsaf Caerdydd Canolog i Warchodfa Gwlyptir Bae Caerdydd.
  • Fforest Fawr - ger Castell Coch mae llwybr natur gwych Fforest Fawr, sy’n werth i deuluoedd ymweld ag ef i fwynhau'r golygfeydd anhygoel.

 

Awgrymiadau ar gyfer diwrnodau allan ar gyllideb yng Nghaerdydd

Nawr eich bod yn gwybod ble i fynd, dyma rai awgrymiadau ychwanegol ar gyfer treulio diwrnod allan yng Nghaerdydd heb wario ffortiwn.

  • Ewch ar drafnidiaeth gyhoeddus - teithiwch ar drên neu fws i leihau eich costau. Chwiliwch am ffyrdd o ostwng y pris, fel ein tocynnau trên i’r Teulu a'n Cardiau Rheilffordd.
  • Peidiwch â phrynu cinio allan - ewch â phecyn bwyd blasus gyda chi.
  • Chwiliwch am fargeinion - os ydych chi’n bwyta allan, cadwch lygad am fargeinion, fel plant yn bwyta am ddim.