Rheilffyrdd TrC Cyfyngedig Cofnodion y Bwrdd - 30 Ebrill 2021

30 Ebrill 2021

12:30 - 17:00

Lleoliad: ar-lein

James Price (JP) (Cadeirydd); Peter Strachan (PS); Heather Clash (HC); Marie Daly (MD); Jan Chaudhry (JC); Alexia Course (AC).

Yn bresennol hefyd: Alun Bowen (Cyfarwyddwr Anweithredol Trafnidiaeth Cymru) a Jeremy Morgan (Ysgrifennydd y Bwrdd). Ymunodd Alan Jones (APJ) ar gyfer eitem 8, Stephanie Raymond (SR) ar gyfer eitem 11 ac ymunodd Colin Lea (CL) ar gyfer eitem 13.

1. Ymddiheuriadau am Absenoldeb

Dim

2. Hysbysiad Cworwm

Gan fod yna gworwm, croesawodd y Cadeirydd bawb i’r cyfarfod a datgan bod y cyfarfod wedi agor.

3. Datganiadau o fuddiannau

Ni ddatgelwyd yr un.

4. Achos Diogelwch

Atgoffwyd y Bwrdd o'r angen i aros yn effro wrth groesi ffyrdd a'r risgiau o gymryd llwybr byr, yn enwedig pan nad oeddent yn cael eu gwylio pan fydd y risg o ymlacio a bod yn ddiofal yn cynyddu. Atgoffwyd y Bwrdd hefyd o'r angen i arwain drwy esiampl a phan wneir rheolau, eu bod yn gytbwys ac yn synhwyrol.

5. Achos Cwsmer

Ystyriodd y Bwrdd y galw am wasanaethau rheilffyrdd yng nghyd-destun busnesau'n newid eu trefniadau gweithio ar ôl COVID, gyda llawer yn debygol o fabwysiadu mwy o arferion gweithio gartref a gweithio hybrid. Mae angen defnyddio data oddi wrth, er enghraifft, IoD, CBI, FSB, Llywodraeth Cymru, awdurdodau lleol a chyflogwyr eraill. Mae Trafnidiaeth Cymru wedi dechrau edrych ar y data hwn [Gweithredu: JP i fynd ar drywydd Lee Robinson a Lewis Brencher]. Gallai gwahanol arferion gwaith effeithio ar refeniw tocynnau Trafnidiaeth Cymru, a chytunodd y Bwrdd y gellid cymryd sawl cam i'w wella gan gynnwys opsiynau tocynnau amgen, cynlluniau teithio wedi'u haddasu a chynlluniau 'rhoi cynnig cyn prynu'.

6. Cofnodion a Chamau Gweithredu’r Cyfarfod Blaenorol

Yn amodol ar fân ddiwygiadau, cymeradwywyd cofnodion Cyfarfod Bwrdd Rheilffyrdd TrC Cyfyngedig 31 Mawrth 2021 fel cofnod gwir a chywir. Cytunwyd y byddai'r Bwrdd yn darparu camau gweithredu awgrymedig i JM erbyn 5 Mai [Gweithredu - PAWB] ac y byddai polisi golygu yn cael ei ddatblygu i gynnwys Grŵp Trafnidiaeth Cymru [Gweithredu JM].

Adolygodd y Bwrdd ddiweddariadau i'r camau gweithredu o'r cyfarfod blaenorol. Trafodwyd cam gweithredu blaenorol yn ymwneud â gofynion fflyd cerbydau.

Gofynnodd y Bwrdd am eglurhad ynghylch a ellid defnyddio systemau telemataidd yn y fflyd cerbydau presennol [Gweithredu MD].

Trafododd y Bwrdd gamau gweithredu ar warantau ar gyfer y model darparu cynnal a chadw fflyd arfaethedig. 

Nododd y Bwrdd yr angen i gynllunio gwahanol fathau o ddull methu a chamau gweithredu adweithiol y depo i sicrhau na wneir y gwarantau'n annilys. Cytunwyd, pan ddiffinnir y trefniadau cynnal a chadw, y bydd gweithdai'n cael eu cynnal gyda ffitwyr i sicrhau na wneir y gwarantau'n annilys a bod y gweithdai hyn yn cael eu cynnwys yn y cynllun integredig ar gyfer cyflwyno cerbydau [Cam Gweithredu JC a HC].

7. Trosolwg lefel uchel o faterion cyfredol

Darparodd JC adolygiad o'r prif faterion a datblygiadau ers y cyfarfod diwethaf a diweddarodd y Bwrdd ar brosiectau a mentrau arwyddocaol. Y materion allweddol a gododd o'r trosolwg a'r drafodaeth oedd:

• Mae angen rheoli newidiadau amserlen mis Mai yn ofalus oherwydd bod angen mwy o gapasiti arnynt ond o dan ganllawiau presennol Llywodraeth Cymru arcgyfer cadw pellter cymdeithasol o ddau fetr lle bo hynny'n bosibl.
• Bydd y trenau 769 yn cael eu cyflwyno'n raddol i'r gwasanaeth gyda'r pwynt tanwydd yn Rhymni wrthi’n cael ei adeiladu.
• Mae cynllun ar gyfer y gwaith o wneud cerbydau yn Nhreganna yn cael ei ddatblygu. Cadarnhawyd y bydd dilysiad diogelwch newid yn ei le cyn i'r cynllun gael ei weithredu.
• Mae gwaith yn parhau i integreiddio'r Trenau Dosbarth 230 a Dosbarth 153/4 i'r gwasanaeth.

8. Dangosyddion Perfformiad Allweddol

Ymunodd Alan Jones (APJ) â'r cyfarfod i roi trosolwg o'r broses adrodd arfaethedig ar gyfer Dangosyddion Perfformiad Allweddol strategol Rheilffyrdd TrC. Ar gyfer pob Dangosydd Perfformiad Allweddol a nodir fel 'coch', bydd perchnogion Dangosyddion Perfformiad Allweddol yn darparu cynllun gweithredu ar gyfer lliniaru a fydd yn cael ei ddiweddaru'n barhaus drwy'r cylch adrodd er mwyn sicrhau bod fforymau llywodraethu'n cael y wybodaeth ddiweddaraf, gydag unrhyw newidiadau hefyd yn cael eu rhannu â fforymau llywodraethu blaenorol. Cymeradwywyd y broses adrodd arfaethedig.

Trafododd y Bwrdd berfformiad gweithredol drwy ystyried y Dangosyddion Perfformiad Allweddol. Roedd perfformiad ar draws y grŵp o ddangosyddion darparu gwasanaeth yn gadarnhaol ar y cyfan o ran gwasanaethau a ganslwyd, Amser mae Teithwyr yn ei Golli ac ar amser i dair munud. Er bod cyfanswm y gwasanaethau a ganslwyd yn perfformio'n well na'r targed, mae risgiau o hyd. Yn benodol, mae dibynadwyedd y fflyd yn cael ei fonitro'n ofalus ac mae cynlluniau dibynadwyedd ar gyfer pob dosbarth o gerbydau yn cael eu datblygu. Atgoffwyd y Bwrdd o rai o'r risgiau penodol sy'n gysylltiedig â dibynadwyedd fflyd, gyda'r Pacers yn cael eu tynnu o'r gwasanaeth fel rhan o newidiadau amserlen mis Mai, a dim ond ar un llinell y gellir defnyddio trenau 769. Yn gyffredinol, mae fflydoedd eraill yn perfformio'n dda. Yr her i'r Swyddogion Gweithredol a'r Bwrdd oedd sicrhau bod y ffocws o ran buddsoddi ac adnoddau yn parhau ar y prif fater o ran darparu gwasanaeth o safon ragorol a dibynadwy. Nododd y Bwrdd fod trefniadau ar waith i ddarparu dadansoddiad manylach ar ffurfiannau byr. 

Rhoddwyd y wybodaeth ddiweddaraf i'r Bwrdd hefyd am berfformiad yn erbyn Dangosyddion Perfformiad Allweddol yn ymwneud â gwasanaeth cwsmeriaid ac absenoldeb staff. Mae refeniw teithwyr wedi cynyddu tua 4% ond mae'n parhau'n isel o'i gymharu â lefelau cyn COVID.

TYNNWYD

Mae ymosodiadau corfforol a digwyddiadau ymddygiad gwrthgymdeithasol wedi lleihau ond maent yn parhau'n rhy uchel. Mae grŵp gorchwyl a gorffen wedi'i sefydlu i ymchwilio.

9. Adroddiad y Bwrdd Rheolwr Gyfarwyddwr - cyfnod 13

Nododd y Bwrdd adroddiad y Rheolwr Gyfarwyddwr ar gyfer cyfnod rheilffyrdd 13, ar ôl ymdrin â materion perfformiad eisoes.

10. Adroddiad diogelwch

Nododd y Bwrdd yr adroddiad diogelwch ar gyfer cyfnod rheilffyrdd 13. Mae'r cynllun diogelwch yn dal i gael ei gynhyrchu a chytunwyd y byddai'r drafft cyntaf wedi'i gwblhau mewn pryd ar gyfer cyfarfod cyntaf y Pwyllgor Diogelwch ar 8 Mehefin [Gweithredu JS ac MD]. 

Bydd Pwyllgor Diogelwch y Bwrdd yn cymryd lle cyfarfod yr Awdurdod Gweithredol Diogelwch fel prif gyfarfod diogelwch y cwmni. PS fydd Cadeirydd y cyfarfod, gan ddarparu her a chraffu annibynnol ar ran Bwrdd Rheilffyrdd TrC. Mae'r cylch gorchwyl a'r agenda sefydlog yn cael eu datblygu [Gweithredu PS, JM].

Nododd y Bwrdd y naratif calonogol ynghylch dangosyddion perfformiad allweddol diogelwch galwedigaethol sy'n parhau i fod yn is na'r ffigurau a ragwelwyd. Roedd holl ganlyniadau dangosyddion perfformiad allweddol diogelwch gweithredol diwedd blwyddyn yn is na'r ffigurau a ragwelwyd. 

Croesawodd y Bwrdd hefyd ganlyniadau cadarnhaol yr Asesiad o adroddiad Archwiliad Glanhau Covid Asesiad Aeddfedrwydd Rheilffyrdd (RM3).

11. Adolygiad Ariannol

Ymunodd Stephanie Raymond (SR) â'r cyfarfod. Nododd y Bwrdd adolygiad ariannol Cyfnod Rheilffyrdd 13. Roedd y cymhorthdal gweithredu yn £25.2m a oedd yn ffafriol o +£0.3m o'i gymharu â'r ffigur a ragwelwyd. Roedd Refeniw Teithwyr yn £1.4m, yn llai na'r rhagolwg o -£0.8m oherwydd y cyfyngiadau symud parhaus. Roedd costau gweithredu yn ffafriol yn erbyn y costau a ragwelwyd ar draws pob prif faes. Mae oedi wrth recriwtio yn parhau i arwain at arbedion ffafriol (+£0.4m) a chostau amrywiol fel tanwydd (+£0.2m) a gwasanaeth bws yn lle trên (+£0.4m). 

Roedd cymhorthdal Gwariant Cyfalaf yng nghyfnod rheilffordd 13 yn £34.3m (o'i gymharu â £3.3m yng nghyfnod 12) oherwydd cynnydd sylweddol mewn mentrau cyfalaf.

Nododd y Bwrdd fod y cymhorthdal o £70 fesul taith teithiwr yn uwch na'r cyfnod blaenorol er gwaethaf cynnydd mewn teithiau teithwyr. Cytunwyd bod angen ymchwilio i hyn [Gweithredu SR/MD].

TYNNWYD

12. Canolfan Hyfforddi Weithredol Caer

Ystyriodd y Bwrdd gynnig i brydlesu arwynebedd llawr yn The Steam Mill, Caer i ddarparu ar gyfer y lle sydd ei angen ar gyfer llety hyfforddi ac efelychydd newydd yn barod ar gyfer trawsnewid y rhanbarth gogleddol er mwyn cyflawni amserlen Rhagfyr 2022. Amlinellwyd mai'r rhesymau dros ddewis y safle yng Nghaer oedd y lleoliad presennol ar gyfer y gweithgareddau hyfforddi, amser i deithio i'r rhai a fyddai'n defnyddio'r cyfleuster a Chaer oedd depo mwyaf Rheilffyrdd TrC. Yn dilyn trafodaeth, gohiriodd y Bwrdd benderfyniad ar argymhelliad y papur tra'n aros i ystyriaeth bellach o opsiynau eraill drwy bapur wedi'i ddiweddaru gael ei ddosbarthu y tu allan i'r pwyllgor [Cam Gweithredu MD].

TYNNWYD

14. Dogfen Fframwaith Drafft

Cymeradwyodd y Bwrdd Ddogfen Fframwaith Rheilffyrdd Trafnidiaeth Cymru, yn amodol ar fân ddiwygiadau. Rhoddwyd awdurdod dirprwyedig i HC a JC i'w lofnodi'n derfynol [Gweithredu JM, HC a JC].

15. UNRHYW FATER ARALL

Cafodd Trafnidiaeth Cymru hysbysiad yr wythnos diwethaf y bydd Llywodraeth Cymru yn cyflwyno papur i Weinidogion newydd Cymru yn cwmpasu llawer o feysydd polisi, yn gofyn am gyllid cynyddrannol ar gyfer COVID. Mae gwaith yn mynd rhagddo i sicrhau bod ffigurau Trafnidiaeth Cymru yn cael eu cynnwys yn y papur.

Diolchodd y Cadeirydd i bawb am eu cyfraniadau, a daeth â'r cyfarfod i ben.