Gwelliannau i Amddiffyn Arfordirol Llandrillo-yn-Rhos a Theithio Llesol
Amcanion
Yn 2024, cwblhawyd y gwaith o adnewyddu'r promenâd a gwella amddiffynfeydd arfordirol yn Llandrillo-yn-Rhos.
Mae'n enghraifft o sut y gellir cyfuno gwelliannau amgylcheddol a strwythurol â nodweddion creu lleoedd, i greu lle gyhoeddus mwy cynaliadwy, cynhwysol a deniadol.
Yr amcanion oedd:
- Gwella'r promenâd, gan ei drawsnewid i le gyhoeddus modern, cynaliadwy a deniadol.
- Uwchraddio'r amddiffynfeydd arfordirol yn sylweddol i roi amddiffyniad hirdymor i'r arfordir a'r amgylchedd, gan sicrhau bod y promenâd a'r dref y tu ôl iddi wedi'u hamddiffyn rhag bygythiadau'r môr yn y dyfodol.
Disgrifiad
Roedd elfennau allweddol y prosiect yn cynnwys:
- Uwchraddio amddiffynfeydd arfordirol gan gynnwys addasiadau i grwyn creigiog yn Harbwr Rhos. Cynlluniwyd y mesurau hyn i amddiffyn y dref a darparu sefydlogrwydd arfordirol hirdymor.
- Lledu'r promenâd i greu mwy o le i gerddwyr a beicwyr. Roedd yr uwchraddio hefyd yn cynnwys meinciau newydd, llochesi a goleuadau modern.
- Ychwanegu 56 o blanhigion a 75 o goed.
- Mannau chwarae newydd i blant, llwybrau beicio ychwanegol a mannau hamdden ar gyfer dosbarthiadau ffitrwydd, tripiau ysgol a gweithgareddau cymunedol eraill.
- Integreiddio gyda Llwybr 5 y Rhwydwaith Beicio Cenedlaethol, gan wneud y darn hwn o arfordir yn gyrchfan fwy deniadol i feicwyr.
Drwy fynd i'r afael ag anghenion esthetig ac amddiffynnol yr arfordir, mae'r prosiect hwn wedi llwyddo i drawsnewid llwybr glan môr sydd heb ei ddefnyddio'n ddigonol i le hwyliog a deniadol.
Gyda hygyrchedd gwell, gwarchodaeth amgylcheddol, a lle i fusnesau lleol, mae'r prosiect yn cynrychioli buddsoddiad gwerthfawr yn nyfodol Llandrillo-yn-Rhos a'r ardaloedd cyfagos.
Cost
£760,000.
Gwersi a ddysgwyd
Cyn i'r prosiect ddechrau, roedd y promenâd wedi'i oleuo'n wael, roedd ganddo arwynebau anwastad a llochesi dadfeilio. Arweiniodd yr amodau hyn at yr ardal yn cael ei thanddefnyddio. Yr her oedd uwchraddio'r promenâd gan sicrhau bod y gymuned leol yn teimlo perchnogaeth dros y lle.
Roedd rhaid dylunio'r promenâd i ddarparu ar gyfer pobl o bob oed a gallu. Fel ateb, mae'r lle ehangach yn sicrhau hygyrchedd i rieni â phramiau, pobl â phroblemau symudedd, ac amrywiaeth o wahanol grwpiau defnyddwyr. Yn ogystal, creuwyd mannau chwarae a mannau hamdden newydd i wneud y promenâd yn lleoliad deniadol i deuluoedd a phobl ifanc.
Er mwyn sicrhau cefnogaeth y gymuned, roedd y contract adeiladu yn cynnwys cymalau a oedd yn ei gwneud yn ofynnol i bobl ddi-waith a chyflenwyr lleol ymgysylltu. Cyflogwyd naw o unigolion lleol yn uniongyrchol ar y prosiect, gan elwa o greu swyddi mewn ardal sydd â galw mawr am gyflogaeth. Defnyddiodd y prosiect gyflenwyr lleol yn helaeth hefyd, gan hyrwyddo twf economaidd rhanbarthol a sicrhau bod y gwelliannau o fudd uniongyrchol i'r gymuned leol.
Allbynnau
Mae adnewyddu'r promenâd a'r amddiffynfeydd arfordirol wedi darparu nifer o fanteision i'r gymuned leol a'r amgylchedd.
Mae'r amddiffynfeydd arfordirol yn darparu amddiffyniad hirdymor i'r dref rhag bygythiadau erydiad a llifogydd. Mae'r mesurau hyn yn helpu i ddiogelu'r amgylchedd a'r seilwaith lleol, gan sicrhau bod yr ardal yn parhau i fod yn addas i fyw ynddi ac yn ddeniadol i genedlaethau'r dyfodol.
Cafodd y prosiect effaith economaidd gadarnhaol drwy ymgysylltu gyda gweithwyr a chyflenwyr lleol, felly yn gyfrannu at yr economi leol. Mae trigolion bellach yn gallu mwynhau glan y môr mewn modd diogel a hygyrch. Yn ogystal, disgwylir i'r promenâd gwell ddenu mwy o ymwelwyr, gan hybu busnesau lleol a thwristiaeth.
Nodyn: Mae lleoliadau cyfrif teithio llesol parhaol ar waith i fonitro newidiadau mewn siwrneiau cerddwyr a beicwyr ar hyd y llwybr hwn. Bydd yr astudiaeth achos yn cael ei diweddaru unwaith y bydd data 2024/25 yn cael ei dderbyn.
Cyswllt
