![](/sites/default/files/2024-02/Active%20travel%20toolkit%20header.jpg)
Gwella Llwybr y Taf rhwng Trallwn a Chilfynydd
Nodau
Yn 2021/22, ail-aliniodd Rhondda Cynon Taf ran o Lwybr Taf rhwng Trallwn a Chilfynydd. Roedd hyn mewn ymateb i ddifrod storm sylweddol.
Dyma oedd y nodau:
- gwella diogelwch cerddwyr a beicwyr.
- annog mwy o bobl i gerdded, beicio a defnyddio olwynion.
- hyrwyddo mynediad i gymunedau lleol.
Disgrifiad
Roedd y llwybr rhwng Trallwn a Chilfynydd ar hyd Llwybr Taf yn dueddol o ddioddef llifogydd ac roedd hyn yn aml yn arwain at gau’r llwybr. Daeth yn angenrheidiol darparu llwybr gwell i sicrhau diogelwch a hyrwyddo mynediad i gerddwyr a beicwyr. Penderfynwyd ar leoliad y llwybr newydd a gwell gyda chymorth ymgynghori ac ymgysylltu â’r cyhoedd.
Fe wnaeth y prosiect (a ariannwyd gan Gronfa Teithio Llesol Llywodraeth Cymru) ddarparu llwybr tri metr o led wedi’i adeiladu ar dir uwch gyda llai o berygl llifogydd, gan gydymffurfio â’r Canllawiau Dylunio Teithio Llesol presennol. Mae’r prosiect yn barhad o waith y cyngor i wella llwybrau ar hyd Llwybr Taf. Ail-agorodd y llwybr i’r cyhoedd ar 18 Mawrth 2022, ac mae’n darparu dolen o Gilfynydd i bont droed Nant Cae Dudwg a gafodd ei huwchraddio yn 2019/20.
Gwersi a ddysgwyd
Drwy weithio gyda rhanddeiliaid allanol, fel Sustrans, sicrhawyd bod y prosiect o safon uchel gyda strategaethau hyrwyddo ac ymgynghori llwyddiannus.
Cymerodd fwy o amser na’r disgwyl i glirio’r safle, ac mae angen ystyried hyn mewn amserlenni ar gyfer prosiectau yn y dyfodol.
Roedd mynediad tir i lesddeiliaid yn gymhleth. Fodd bynnag, wrth symud ymlaen, mae’r awdurdod lleol wedi rhoi polisïau ar waith i hwyluso’r broses hon.
Roedd y costau’n fwy na’r cyllid. Fodd bynnag, mae’r awdurdod lleol yn gweithio gyda TrC i fynd i’r afael ag effaith chwyddiant a phroblemau’n ymwneud â’r gadwyn gyflenwi.
Allbynnau
Mae’r llwybr gwell rhwng Trallwn a Chilfynydd wedi creu gwell mynediad i gymunedau lleol ac wedi diogelu rhan o Lwybr Taf sy’n cael ei ddefnyddio’n helaeth. Fe wnaeth ymgysylltu ac ymgynghori effeithiol â’r cyhoedd sicrhau bod y llwybr newydd yn diwallu anghenion cymunedau lleol. Cafodd y prosiect dderbyniad da ar sianeli cyfryngau cymdeithasol yr awdurdod lleol ac mae’n gyfle i annog mwy o bobl i gerdded, beicio neu ddefnyddio olwynion ar eu teithiau bob dydd.
Roedd y strategaeth ymgysylltu â’r cyhoedd yn cynnwys defnyddio sianeli cyfryngau cymdeithasol a gwefan y Cyngor i roi gwybod i’r cyhoedd am y gwaith a oedd yn dechrau ac yn gorffen. Cafodd fideo yn dangos y llwybr wedi’i gwblhau hefyd ei gynnwys yn y datganiad i’r wasg.
Mae data monitro yn dangos bod nifer yr ymwelwyr wedi cynyddu ers i’r llwybr gael ei ailagor.
Yr hen lwybr ar ôl storm
Aliniad newydd y llwybr