Mabwysiadwyr Gorsafoedd

Drwy ein rhaglen 'Mabwysiadu Gorsaf', mae 250 a mwy o wirfoddolwyr yn gweithio i wella a chynnal 151 o orsafoedd yn eu cymunedau lleol o Fôn i Fynwy.

Nod y cynllun hwn yw helpu i wella ein cysylltiadau â chymunedau lleol a chwsmeriaid sy'n byw ger gorsafoedd trenau heb staff. Mae gorsafoedd yn rhan bwysig o gymunedau, ac yn aml, dyma'r peth cyntaf mae pobl yn ei weld wrth gyrraedd tref. Mae amcanion y cynllun yn debyg iawn i'r cynllun 'Gwarchod Cymdogaeth' lle mae pobl leol yn ein helpu drwy gadw llygad ar eu gorsaf a chynnal amgylchedd da i bobl sy'n cyrraedd y gymuned. Mae mabwysiadwyr gorsaf yn cyflwyno o leiaf ddau adroddiad y mis am gyflwr eu gorsaf. Gofynnwn i fabwysiadwyr sôn am faterion a phroblemau sbwriel, graffiti, fandaliaeth, goleuadau, pwyntiau cymorth gwybodaeth, a gwybodaeth am amserlenni.

Yn gyfnewid am eu cymorth gwerthfawr, mae’r holl fabwysiadwyr gorsafoedd yn cael taleb deithio flynyddol i'w defnyddio ar unrhyw ran o rwydwaith trenau'r DU. Hefyd, maen nhw'n cael eu gwahodd i gynhadledd ranbarthol yn yr haf er mwyn cwrdd â mabwysiadwyr eraill a chlywed am ein cynlluniau cyffrous ar gyfer gwella gorsafoedd a'r fflyd cerbydau.

Mae rhai grwpiau mabwysiadu gorsafoedd yn gofalu am arddangosfeydd blodau neu ardd yr orsaf. Llwyddodd gwirfoddolwyr Nantwich i gynnal a chadw'r ardd i safon mor uchel nes ennill gwobr ‘MerseyRail in Bloom’ yng ngwobrau gorsafoedd taclusaf 17 Swydd Gaer, a gynhaliwyd ym mis Ionawr 2020.

Cafodd gorsafoedd Frodsham a Runcorn ganmoliaeth hefyd i nodi adfer gwasanaethau teithwyr rheolaidd gan Trafnidiaeth Cymru, gyda rhai Halton Curve a Wrenbury wedi'u henwi fel y rhai oedd wedi gwella fwyaf. Mae gorsaf y Waun wedi'i chydnabod gan sefydliadau eraill, gan dderbyn Gwobr Clwyd a Gwobr Cymdeithas Ddinesig Wrecsam am welliannau amgylcheddol.

Ers i'r rhaglen ddechrau, mae 151 o orsafoedd wedi'u mabwysiadu. Ar hyn o bryd, mae dros 250 o wirfoddolwyr gweithgar yn helpu i ofalu am ein gorsafoedd. Rydym yn falch o weld cymunedau'n awyddus i gyfrannu at eu gorsafoedd trenau lleol ac yn falch o rôl y cynllun 'Mabwysiadu Gorsaf' o ran helpu pobl i fod yn fwy iach a heini.

Dylai'r cynnydd a wnaed ers mis Mawrth 2019 gael hwb gan welliannau arfaethedig Trafnidiaeth Cymru dros y 12 mis nesaf, fel rhan o'u cynllun busnes.

David Houghton

Mabwysiadwr Gorsaf Wrenbury

Llwytho’r astudiaeth achos i lawr (PDF)