Rydym wedi bod yn gweithio'n galed i uwchraddio llinellau Coryton a Rhymni isaf fel rhan o brosiect Metro De Cymru i wella gwasanaethau rheilffordd i'n teithwyr. Yn dilyn gwaith llwyddiannus i drydaneiddio’r llinellau hyn, rydym yn gyffrous i gyflwyno trenau newydd sbon ar linellau Coryton a Chaerffili i Benarth gan ddechrau ym mis Gorffennaf 2025.
Ym mis Ebrill 2025, dechreuon ni brofi ein trenau Dosbarth 756 newydd ar linell Coryton i'w paratoi ar gyfer gwasanaethu teithwyr. Bydd eu cyflwyno yn cynnig sawl budd i gwsmeriaid, gan gynnwys mwy o gapasiti ar y trên, profiad teithio mwy cyfforddus a mynediad haws o'r trên i'r platfform.
Mae croeso Tŷ Glas ar agor
Mae ein tîm cynnal a chadw wedi cyflawni uwchraddiadau diogelwch hanfodol i'r groesfan reilffordd. Mae'r uwchraddiadau hyn, sy'n cynnwys gosod llawr newydd ar y groesfan a mynedfa Ogleddol newydd, yn hanfodol er mwyn gwella diogelwch i ddefnyddwyr gan fod ein trenau newydd yn dawelach ac yn cyflymu'n gyflymach na'n trenau diesel hŷn.
Gyda'r uwchraddiad hwn bellach wedi'i gwblhau, mae croesfan lefel Tŷ Glas wedi'i hailagor.
Bydd gwaith i ymestyn platfform gorsaf Tŷ Glas yn parhau ac efallai y bydd cyfnodau byr lle bydd angen i ni gau'r groesfan reilffordd i wneud y gwaith hwn. Mae hyn yn cynnwys ei chau ddydd Sadwrn 22 Tachwedd - dydd Llun 8 Rhagfyr.
Wrth ddefnyddio'r groesfan reilffordd, cofiwch stopio, edrych i'r ddau gyfeiriad a gwrando cyn croesi'r rheilffordd. Os ydych chi'n reidio beic, gwnewch yn siŵr eich bod chi'n dod oddi ar eich beic cyn croesi. Tynnwch unrhyw bethau sy'n tynnu eich sylw, fel clustffonau, fel y gallwch chi fod yn gwbl ymwybodol o’r hyn sydd o’ch cwmpas.
Hoffem ddiolch i'r gymuned am eu hamynedd parhaus wrth i ni wneud y gwaith hanfodol hwn i uwchraddio gorsaf Tŷ Glas a’r groesfan reilffordd.
Cau Gorsaf Tŷ Glas
Er mwyn darparu ar gyfer y trenau newydd hyn sy’n hirach ac sydd â thri cherbyd, byddwn yn cynnal gwaith uwchraddio sylweddol yng ngorsaf Tŷ Glas.
Fel rhan o'r uwchraddiadau hyn, byddwn yn ehangu platfform yr orsaf gan 16 metr. Er mwyn sicrhau diogelwch ein teithwyr wrth i ni gyflawni'r uwchraddiadau hyn, bydd angen i ni gau gorsaf Tŷ Glas dros dro.
Pryd fydd yr orsaf reilffordd yn ailagor?
Disgwylir i’r gwaith o ehangu’r platfform gymryd tua 10 mis, gyda gorsaf Tŷ Glas yn ailagor yng Ngwanwyn 2026. O 19 Gorffennaf i Wanwyn 2026, ni fydd unrhyw wasanaethau rheilffordd yn galw yng ngorsaf Tŷ Glas.
Bydd teithwyr sy'n defnyddio gorsaf Tŷ Glas ar hyn o bryd yn cael eu hailgyfeirio i orsaf Llwynbedw, sydd wedi'i lleoli 0.4 milltir i ffwrdd (tua 8 munud ar droed), lle bydd gwasanaethau rheilffordd yn rhedeg yn ôl yr arfer.
Cwestiynau cyffredin
A fydd trenau'n rhedeg fel arfer o orsaf Llwynbedw?
Ydy, bydd trenau'n rhedeg fel arfer yn Llwynbedw, heb i amseroedd trenau gael eu heffeithio.
A fydd trenau'n stopio yn Nhŷ Glas yn ystod cau'r orsaf?
Na, ni fydd gwasanaethau rheilffordd yn galw yng ngorsaf Tŷ Glas yn ystod y cyfnod o gau'r orsaf. Byddant yn rhedeg trwy'r orsaf, gan alw yn Llwynbedw a Lefel Isel y Mynydd Bychan fel arfer.
A fydd amseroedd trenau yn Llwynbedw a Lefel Isel y Mynydd Bychan yn newid tra bydd gorsaf Tŷ Glas ar gau?
Na, ni fydd amserlen y rheilffordd yn newid. Bydd trenau'n parhau i adael Llwynbedw am XX:17 ac XX:47, ac XX:21 ac XX:51 o Lefel Isel y Mynydd ar gyfer gwasanaethau sy'n teithio i Gaerdydd.
A allaf barhau i ddefnyddio talu wrth fynd tra bod Tŷ Glas ar gau?
Os hoffech barhau i ddefnyddio talu wrth fynd, gallwch ddefnyddio'r dilysydd tapio-i-fewn-tapio-allan yng ngorsaf Llwynfedw, lle bydd gwasanaethau rheilffordd yn gweithredu fel arfer.
Yn ystod cau gorsaf Tŷ Glas, byddwn yn addasu'r pris talu wrth fynd o Lwynfedw dros dro i gyd-fynd â'r pris o Tŷ Glas.
Sylwch mai dim ond tra bod gorsaf Tŷ Glas ar gau y bydd y newid prisio hwn yn berthnasol. Unwaith y bydd Tŷ Glas yn ailagor yng Ngwanwyn 2026, bydd y prisiau talu wrth fynd o Lwynfedw yn dychwelyd i'w gyfradd safonol.
Nid yw'r newid pris hwn yn berthnasol i unrhyw orsafoedd na pharthau Metro eraill ac mae'n lliniaru dros dro i gefnogi teithwyr yr effeithir arnynt gan gau gorsaf Tŷ Glas.
Gellir dod o hyd i ragor o wybodaeth am brisiau talu wrth fynd yma: Talu wrth fynd.
Faint o drenau Dosbarth 756 (trenau newydd) fydd yn cael eu cyflwyno ar linellau Coryton a Chaerffili?
Rydym wedi llwyddo i gyflwyno ein pum trên newydd sbon. Mae'r trenau newydd hyn yn golygu bod cwsmeriaid bellach yn elwa o fwy o gapasiti ar drenau yn ogystal â dibynadwyedd a pherfformiad gwell ein gwasanaethau rheilffordd.
A yw'r groesfan reilffordd yn Hawl Tramwy Cyhoeddus?
Na, nid yw'r groesfan yn Hawl Tramwy Cyhoeddus ac nid yw'n llwybr troed mabwysiedig. Trafnidiaeth Cymru sy'n berchen ar y groesfan a'i phwrpas yw darparu mynediad i blatfform gorsaf Tŷ Glas.
Oes unrhyw wasanaethau bysiau lleol y gallaf eu defnyddio i fynd i mewn ac allan o Gaerdydd tra bod gorsaf Tŷ Glas ar gau?
Oes, mae Bws Caerdydd yn rhedeg nifer o wasanaethau ar hyd y llwybr hwn, gan gynnwys:
- 86 (Canol y Ddinas i Lys-faen)
- 27 (Canol y Ddinas i Lanisien a’r Ddraenen)
- 21/23 (Canol y Ddinas i Rhiwbeina, Yr Eglwys Newydd a Phantmawr).
Sut ydym ni'n cyfleu’r newyddion ein bod ni’n cau'r orsaf a'r groesfan reilffordd i ysgolion lleol?
Rydym yn deall bod yr orsaf a'r groesfan reilffordd yn cael eu defnyddio'n helaeth gan ddisgyblion i gyrraedd ysgolion lleol. Ein blaenoriaeth yw sicrhau bod pobl ifanc yn gwybod sut i ddefnyddio'r rheilffordd yn ddiogel.
Bydd ein partneriaid addysgol Bollo yn cysylltu ag ysgolion lleol i gynnig sgyrsiau diogelwch ynghylch sut i ddefnyddio'r rheilffordd yn ddiogel, sydd bellach yn bwysicach fyth oherwydd y gwaith trydaneiddio diweddar ar linell Coryton.
Drwy gydol yr haf, byddwn hefyd yn cynnal digwyddiadau dros dro i addysgu cymunedau am y peryglon uwch o ganlyniad i dresmasu ar y rheilffordd nawr bod dros 70% o linellau rheilffordd Craidd Cymoedd De Cymru wedi'u trydaneiddio. Mae rhagor o wybodaeth am ein hymgyrch diogelwch Dim Ail Gyfle ar gael yma.
A fydd y rhan fwyaf o'r gwaith adeiladu i ehangu platfform yr orsaf yn digwydd yn ystod y dydd?
Bydd, gan fod yr orsaf ar gau, bydd gan ein timau fynediad llawn i'r orsaf er mwyn cwblhau'r gwaith o ehangu’r platfform. Oherwydd hyn, rydym yn disgwyl i'r rhan fwyaf o'r gwaith gael ei gwblhau yn ystod y dydd. Fodd bynnag, pan fydd angen i ni weithio yn ystod y nos, byddwn yn ysgrifennu at ein cymdogion wrth ymyl y cledrau i'w hysbysu.
Rhagor o wybodaeth
Hoffem atgoffa pawb fod ceisio cyrraedd yr orsaf a'r groesfan reilffordd tra ei bod ar gau yn hynod beryglus, yn enwedig gan na fydd trenau'n galw yng ngorsaf Tŷ Glas a bydd ein timau'n defnyddio peiriannau trwm i gyflawni'r gwaith uwchraddio hwn.
Mae unrhyw un sy'n tresmasu ar y rheilffordd mewn perygl o gael anaf difrifol a/neu farwolaeth. Os ydych chi'n gweld unrhyw un ar y rheilffordd nad ydych chi'n credu sydd i fod yno, ffoniwch 999 cyn gynted ag y gallwch.
Ar gyfer achosion nad ydynt yn rhai brys, anfonwch neges destun at Heddlu Trafnidiaeth Prydeinig ar 61016.
Gallwch ddarllen rhagor am offer llinellau uwchben yma.
Mae rhagor o wybodaeth am ein hymgyrch ddiogelwch Dim Ail Gyfle i’w chael yma.
