Gwella sut rydym yn cael cyngor gan bartneriaid a chwsmeriaid
Ein Pensaernïaeth Gynghori yw un o'r ffyrdd yr ydym yn gweithio gyda lleisiau allanol i lunio a chraffu ar ein gwaith.
Dyma'r rhwydwaith o baneli, fforymau a byrddau lle gall cwsmeriaid, cymunedau, sefydliadau partner a phobl sydd â phrofiad byw perthnasol rannu adborth, her a chyngor gyda ni. Mae hyn yn helpu i sicrhau bod y penderfyniadau a wnawn yn adlewyrchu gwir anghenion y bobl yr ydym yn eu gwasanaethu.
Sut mae'r cyngor hwn yn cefnogi Teithio i bawb
Mae polisi Teithio i bawb Llywodraeth Cymru yn nodi gweledigaeth ar gyfer rhwydwaith trafnidiaeth sy'n gweithio i bawb - lle gall pawb deithio'n ddiogel ac yn hyderus. Y pum egwyddor craidd o Deithio i Bawb yw: teimlo'n ddiogel, teimlo bod croeso i chi, hygyrchedd, cynnwys, ac ymgorffori newid.
Fel sefydliad, mae gennym gyfrifoldeb i ymgorffori'r egwyddorion hyn ym mhopeth a wnawn - nid yn unig yn ein gwasanaethau, ond yn y ffordd yr ydym yn cynllunio, dylunio a gwneud penderfyniadau. Mae ein pensaernïaeth ymgynghorol yn un o'r ffyrdd pwysicaf yr ydym yn gwneud hynny.
Ar hyn o bryd mae'r system yn cynnwys:
- Bwrdd Teithio Cynhwysol - yn rhoi cyngor a sicrwydd i Lywodraeth Cymru a TrC, gan sicrhau bod darparwyr trafnidiaeth yn ystyried yr egwyddorion Teithio i Bawb. Wedi'i gadeirio'n annibynnol, gyda'r aelodau yn cynrychioli ystod eang o sefydliadau a chymunedau.
- Panel Teithio Pobl Anabl - yn darparu cyngor ar wneud ein rhwydweithiau'n fwy hygyrch a chynhwysol, gyda 15 aelod yn cynnwys y rhai sydd â phrofiad byw o anableddau gweladwy a chudd.
- Panel Cynghori Gwrth-hiliaeth - yn helpu TrC i gyflawni amcanion ein Cynllun Gweithredu Gwrth-hiliaeth, gan ddod â phobl sydd â phrofiad byw, cydweithwyr TrC ac arbenigwyr allanol ynghyd.
- Paneli Cynghori ar Ddatblygu Cynaliadwy a Threftadaeth - darparu arweiniad ar ddatblygu cynaliadwy ac agweddau ar ein gwaith sy'n gysylltiedig â threftadaeth, gydag aelodau'n cynrychioli sefydliadau fel CADW, Cyngor Celfyddydau Cymru a Network Rail.
- Panel y Diwydiant Diwygio Bysiau - yn cefnogi cyd-greu masnachfreinio bysiau yng Nghymru hyd at 2030, ochr yn ochr â Llywodraeth Cymru, cynrychiolwyr o’r diwydiant a rhanddeiliaid allweddol.
- Panel Cynghori Pobl Ifanc - mae'r panel hwn wrthi'n cael ei sefydlu ar hyn o bryd a bydd yn sicrhau bod pobl ifanc yn cael cyfle i leisio eu barn mewn penderfyniadau trafnidiaeth sy'n effeithio arnynt.
- Fforwm digidol Dweud eich Dweud - platfform ar-lein gyda thua 2,000 o ddefnyddwyr a phobl nad ydynt yn defnyddio trafnidiaeth gyhoeddus a theithio llesol o bob cwr o Gymru, yn ein helpu i gasglu ystod eang o safbwyntiau gan ddefnyddwyr.
Cymerwch ran
Os hoffech chi gael gwybod mwy am ein Grŵp Cynghori, neu sut y gallech chi neu'ch sefydliad gyfrannu, cysylltwch â'n tîm Ymgysylltu ymgysylltu@trc.cymru.
Bwrdd Teithio Cynhwysol Trafnidiaeth Cymru
Mae'r rheini sy'n eistedd ar y Bwrdd Teithio Cynhwysol yn cynrychioli cwsmeriaid, y llywodraeth, y diwydiant a phobl â nodweddion gwarchodedig ac yn rhannu safbwyntiau am wahanol ddulliau o deithio. Mae'r Bwrdd Teithio Cynhwysol yn darparu cyngor a sicrwydd strategol i TrC, Llywodraeth Cymru a Gweinidogion Cymru, ar leihau rhwystrau i drafnidiaeth gyhoeddus, gan sicrhau bod yr egwyddorion Teithio i Bawb yn cael eu hymgorffori ar draws yr holl rwydweithiau trafnidiaeth.
Nod y Bwrdd Teithio Cynhwysol yw darparu adborth, mynd ati i graffu a rhoi cyngor i TrC ar ystod eang o bynciau a materion, gan gynnwys profiad cwsmeriaid a phrosiectau trawsnewid o bwys mawr.
Caiff y Bwrdd Teithio Cynhwysol ei gadeirio yn annibynnol gan Leah Morantz, Pennaeth Cyfathrebu, Iechyd Cyhoeddus Cymru. Mae'r Bwrdd yn cyfarfod bob chwarter.
Nodyn croeso gan Leah Morantz, Cadeirydd
Mae gan Trafnidiaeth Cymru (TrC) strategaeth uchelgeisiol i ddarparu system drafnidiaeth aml-ddull wirioneddol integredig ar gyfer Cymru a'r Gororau - ac agwedd hanfodol ar hynny yw sicrhau bod gwasanaethau'n gynhwysol, yn hygyrch ac yn ddiogel. Rydym wedi gweld cynnydd ystyrlon yng Nghymru dros y flwyddyn ddiwethaf (2025-2026) ac rwy'n falch bod y Bwrdd Cynghori wedi gallu gweithio'n agos gyda TrC i sicrhau bod lleisiau dinasyddion mewn cymunedau ledled Cymru yn parhau i fod yn ganolog i gynllunio a chyflawni.
Sefydlwyd y Bwrdd Teithio Cynhwysol ym mis Ebrill 2026 i gymryd lle'r Panel Cynghori. Mae gan y Bwrdd newydd hwn gylch gwaith ehangach a ffocws cryfach ar sicrhau bod y polisi Teithio i Bawb yn cael ei wireddu. Rhan o'n gwaith yw sicrhau bod TrC yn gwrando ar ystod eang o grwpiau cynrychioliadol i wneud yn siŵr bod lleisiau ein cymunedau yn cael eu clywed. Ac yn benodol, bod y lleisiau hynny'n parhau i lunio penderfyniadau strategol.
Pwrpas y Bwrdd Teithio Cynhwysol yw sicrhau ein bod yn creu deialog dda a chyfle i Trafnidiaeth Cymru glywed adborth a barn grwpiau cynrychioliadol fel y gallwn lunio datblygiad gwasanaethau trafnidiaeth yng Nghymru. Mae wedi bod yn hyfryd dechrau'r gwaith hwn gydag ymrwymiad parhaus aelodau presennol yn ogystal ag aelodau newydd yn ymuno â'r sgwrs, sy’n ein helpu i glywed o ystod ehangach o safbwyntiau.
Fel bob amser, mae agwedd agored barhaus tîm arwain Trafnidiaeth Cymru i glywed adborth a gweithredu arno wedi gwneud argraff fawr arna i.
Mae staff ar draws Trafnidiaeth Cymru yn gweithio'n galed i wella'r rhwydwaith trafnidiaeth yng Nghymru a'r Gororau ac mae Trafnidiaeth Cymru eisoes wedi cyflawni gwelliannau sylweddol.
Bydd y Bwrdd Teithio Cynhwysol yn anelu at fod yn rym dros newid cadarnhaol, gan ddarparu arweiniad a chyngor i Trafnidiaeth Cymru trwy gyfnod deinamig o newid ar gyfer trafnidiaeth gyhoeddus yng Nghymru a'r Gororau. Edrychaf ymlaen at weithio gydag aelodau'r Panel a chyda Trafnidiaeth Cymru i gefnogi ei genhadaeth ac i sicrhau bod lleisiau teithwyr wrth wraidd y ddarpariaeth.
