Archwilio Criced yng Nghymru

Mae gan griced hanes hir a chwedlonol yng Nghymru, yn dyddio'n ôl i 1888 pan ffurfiwyd Criced Morgannwg gyntaf. O awyrgylch egnïol The Hundred i gyflymder mwy hamddenol gêm Bencampwriaeth Sirol pedwar diwrnod, mae fformat i bob cefnogwr ei fwynhau.

P'un a ydych chi'n gefnogwr gydol oes neu'n deulu sy'n chwilio am weithgaredd newydd i’w fwynhau ar y penwythnos, mae criced yn cynnig diwrnod allan gwych. Rydyn ni yma i'ch helpu chi i osgoi'r traffig a theithio mewn ffyrdd sy'n dda i chi a'r blaned, gan eich cael chi i'r maes, yn barod ar gyfer y bêl gyntaf.

Ble i wylio'r gêm broffesiynol

Er bod llawer o glybiau ledled y genedl yn cynnal gemau, mae'r rhan fwyaf o gemau proffesiynol yn digwydd mewn lleoliadau eiconig sy'n hawdd eu cyrraedd gan ddefnyddio ein rhwydwaith.

Gerddi Sophia, Caerdydd

• Yn gartref i: Clwb Criced Sir Forgannwg a’r Tân Cymreig (The Hundred).
• Y profiad: Mae'r stadiwm 16,000 sedd hwn o'r radd flaenaf yn enwog am ei awyrgylch gwefreiddiol. Bydd teuluoedd wrth eu bodd â gemau'r Hundred, sy'n aml yn cynnwys cerddoriaeth fyw ac adloniant ychwanegol ochr yn ochr â'r gemau 100 pêl cyflym.
• Yr orsaf agosaf: Gorsaf Caerdydd Canolog
• Cyrraedd yno: Taith ddymunol 15 - 20 munud ar droed ydyw o'r orsaf drwy Barc deiliog Bute, sy’n dilyn glannau Afon Taf.

Maes Rygbi a Chriced Sain Helen, Abertawe

• Rheswm dros ei enwogrwydd ym myd criced: Mae'r maes hwn yn chwedlonol am fod y safle lle tarodd Syr Garfield Sobers chwe chwech mewn un belawd ym 1968.
• Y profiad: Mae Sir Forgannwg yn defnyddio Sain Helen yn rheolaidd fel "maes awyr agored", gan gynnal gŵyl griced haf boblogaidd yn aml. Mae ei leoliad ar lan y môr yn ei gwneud yn ddewis perffaith ar gyfer diwrnod heulog allan.
• Yr orsaf agosaf: Gorsaf Abertawe
• Cyrraedd yno: Mae'r maes wedi'i leoli yn ardal Brynmill, tua 20 munud o waith cerdded neu daith fer ar fws o'r orsaf.

Clwb Criced Bae Colwyn (Penrhyn Avenue)

• Y profiad: Yn adnabyddus am ei faes o’r radd flaenaf yng ngogledd Cymru, mae Bae Colwyn yn aml yn cynnal gemau pencampwriaeth sirol. Mae'n cynnig awyrgylch clwb traddodiadol gyda bar trwyddedig a ffreutur sy’n cynnig byrbrydau ar ddiwrnod gêm.
• Yr orsaf agosaf: Gorsaf Bae Colwyn
• Cyrraedd yno: Mae'r maes wedi'i leoli yn Llandrillo-yn-Rhos, taith fer ar fws o'r brif orsaf.

Cymryd rhan: Ble i chwarae a dysgu

Nid dim ond chwaraeon i wylwyr yw criced; mae'n ffordd wych i deuluoedd fwynhau chwaraeon gyda'i gilydd.

• I’r plant: Mae Rhaglen Griced All Stars wedi'i chynllunio ar gyfer plant 5 - 8 oed, gan ddarparu cyflwyniad hwyliog wyth wythnos i'r gêm. Cynhelir dros 220 o sesiynau ledled Cymru, gan gynnwys canolfannau mawr fel Clwb Criced Casnewydd.
• Chwarae cynhwysol: Mae llawer o glybiau, fel Bae Colwyn, bellach yn cynnig adrannau criced gallu cymysg i sicrhau y gall pawb fwynhau'r gamp waeth beth fo'u hanghenion.
• Canolfannau ar lawr gwlad: Mae tiroedd hanesyddol fel y Gnoll yng Nghastell-nedd yn cynnig cefndir hardd ar gyfer criced cymunedol. Tra byddwch chi yno gallwch ymweld â chanolfan ymwelwyr Parc Gwledig y Gnoll, gyda chaffi a man chwarae meddal i blant iau.

Cyngor ar gyfer taith ddymunol

Caiff diwrnodau gemau eu mwynhau orau pan fyddwch chi wedi cynllunio ymlaen llaw. Dyma sut i wneud eich taith mor rhwydd â phosibl:

• Defnyddiwch ein ap: Lawrlwythwch ap TrC i gadw eich e-docyn a gwirio diweddariadau byw ar gyfer eich gorsaf benodol.
• Prynwch eich tocynnau’n gynnar: Rydym bob amser yn argymell eich bod yn prynu tocyn Advance ar ein gwefan neu ap i ddod o hyd i'n prisiau isaf.
• Osgowch y traffig: Osgowch y straen o barcio ar ddiwrnod gêm drwy fynd ar y trên neu'r bws yn uniongyrchol i ganol y cyffro.
• Gwiriwch cyn teithio: Gwiriwch bob amser am unrhyw newidiadau i wasanaethau neu weithredu diwydiannol cyn i chi fynd i'r orsaf.

Cwestiynau cyffredin ynghylch teithio i griced yng Nghymru