Beth i’w wneud yn Birmingham

Pendroni beth i’w wneud yn Birmingham? O amgueddfeydd a siopa i gamlesi, atyniadau teuluol a sîn fwyd sy’n cael ei dylanwadu gan fwydydd o bob cwr o’r byd, mae digon i’w weld a’i wneud.

Mae Birmingham New Street yn eich rhoi yng nghanol y ddinas, felly mae llawer o’r llefydd mwyaf adnabyddus i ymweld â nhw o fewn pellter cerdded neu daith fer ar ôl i chi gyrraedd.

Dewch i ddarganfod hanes a diwylliant Birmingham

Amgueddfa ac Oriel Gelf Birmingham

Mae Amgueddfa ac Oriel Gelf Birmingham wedi bod yn rhan o’r ddinas ers 1885 ac mae’n gartref i gasgliadau sy’n cwmpasu celf, hanes, archaeoleg a stori Birmingham ei hun. Cadwch lygad am ei chasgliad o gelf Cyn-Raffaelaidd ochr yn ochr ag arddangosfeydd sy’n newid drwy gydol y flwyddyn.

Mae ei leoliad canolog yn ei gwneud yn hawdd ei gynnwys mewn diwrnod o grwydro’r ddinas.

Tai Cefn wrth Gefn Birmingham

Camwch i mewn i un o lysoedd olaf Birmingham o dai cefn wrth gefn a phrofi sut beth oedd bywyd bob dydd i’r teuluoedd a oedd yn byw ac yn gweithio yno.

Bellach dan ofal yr Ymddiriedolaeth Genedlaethol, mae’r tai wedi cael eu hadfer i adlewyrchu gwahanol gyfnodau o hanes diwydiannol Birmingham. Gall fod yn brysur yno, felly gwnewch yn siŵr eich bod yn archebu eich taith ymlaen llaw i sicrhau eich lle ar y diwrnod.

Yr Ardal Gemwaith

Mae’r Ardal Gemwaith wedi chwarae rhan bwysig yn hanes gweithgynhyrchu Birmingham ers dros 200 mlynedd. Heddiw, mae’n dal yn gartref i weithdai gemwaith a busnesau annibynnol, ochr yn ochr â llawer o atyniadau eraill.

Os yw amgueddfa at eich dant, gallwch hefyd ymweld ag Amgueddfa’r Ardal Gemwaith i ddysgu mwy am y crefftwyr a’r busnesau a helpodd i siapio’r ardal.

Gweithgareddau i’r teulu cyfan yn Birmingham

Cadbury World

Gall y rhai ohonoch sy’n caru siocled archwilio’r stori y tu ôl i un o fentrau enwocaf Birmingham yn Cadbury World. Dysgwch sut mae siocled yn cael ei wneud, ymchwiliwch i hanes Cadbury a mwynhewch brofiadau rhyngweithiol ar hyd y ffordd.

Mae Cadbury World wedi’i leoli yn Bournville (a roddodd ei enw i’r siocled tywyll eiconig), sy’n daith fer ar y trên o ganol dinas Birmingham.

Amgueddfa Wyddoniaeth Thinktank Birmingham

O injans stêm a Spitfires i’r gofod a’r corff dynol, mae gan Amgueddfa Wyddoniaeth Thinktank Birmingham bedwar llawr o arddangosfeydd cyffrous i’w harchwilio.

Mae yno hefyd blanetariwm, Gardd Wyddoniaeth a MiniBrum - dinas fach ryngweithiol sydd wedi’i dylunio ar gyfer ymwelwyr iau. Dim ots beth yw eich oedran, mae’n ddiwrnod llawn hwyl.

Amgueddfa Fyw y Wlad Ddu

Camwch yn ôl i’r gorffennol yn Amgueddfa Fyw y Wlad Ddu. Cewch weld sut roedd pobl yn byw ac yn gweithio ar draws y rhanbarth yn ystod ei orffennol diwydiannol.

Camwch ar strydoedd hanesyddol sydd wedi’u hail-greu, ewch i siopau a gweithleoedd traddodiadol, cwrdd â chymeriadau hanesyddol a gwylio arddangosiadau byw sy’n dod â stori’r Wlad Ddu yn fyw.

Wedi’i leoli yn Dudley, mae’r amgueddfa ychydig ymhellach o ganol dinas Birmingham, felly mae’n gweithio orau fel diwrnod allan pwrpasol. Peidiwch â phoeni, mae digon i’w wneud a’i weld i warantu trip diwrnod llawn!

Siopa yn Birmingham

Os yw siopa’n uchel ar eich rhestr o bethau i’w gweld a’u gwneud yn Birmingham, ni fydd yn rhaid i chi fentro’n bell ar ôl i chi adael yr orsaf.

Mae Bullring & Grand Central wedi’u cysylltu’n uniongyrchol â Birmingham New Street ac mae yno rai o ffefrynnau stryd fawr y wlad, siopau adrannol a lleoedd i fwyta.

I gael rhywbeth mwy annibynnol, ewch i Digbeth, lle gallwch ddod o hyd i siopau, marchnadoedd a lleoedd annibynnol i fwyta ac yfed.

Archwiliwch gamlesi Birmingham

Mae rhwydwaith camlesi Birmingham yn cynnig ffordd dawelach o weld y ddinas.

Cerddwch ar hyd y llwybrau tynnu o amgylch Brindleyplace a Gas Street Basin, arhoswch am rywbeth i’w fwyta wrth ymyl y dŵr neu ewch yn eich blaen tuag at atyniadau gan gynnwys Oriel Ikon a Llyfrgell Birmingham.

Gallwch hefyd fynd ar daith cwch camlas i gael golwg wahanol ar y ddinas a dysgu mwy am orffennol diwydiannol Birmingham ar hyd y ffordd.

Bwyd a diod yn Birmingham

Mae sîn fwyd Birmingham yn adlewyrchu’r cymunedau niferus sy’n galw’r ddinas yn gartref.

Helpodd y Triongl Balti i roi Balti nodweddiadol Birmingham ar y map, tra bod Digbeth yn adnabyddus am fwyd stryd a digwyddiadau bwyd rheolaidd.

Byddwch hefyd yn dod o hyd i fwytai â sêr Michelin, tafarndai traddodiadol, caffis a bwyd o bob cwr o’r byd ledled canol y ddinas a’r cymdogaethau cyfagos.

Parciau a meysydd glas

Gerddi Botanegol Birmingham

Mae Gerddi Botanegol Birmingham yn lle gwych i archwilio tai gwydr, gerddi a chasgliadau o blanhigion ar draws 15 erw.

Mae’r gerddi’n gartref i filoedd o blanhigion o bob cwr o’r byd ac maent yn cynnal gweithgareddau i’r teulu a digwyddiadau tymhorol yn rheolaidd.

Parc Cannon Hill

Mae Parc Cannon Hill yn un o fannau gwyrdd mwyaf adnabyddus Birmingham, gyda llwybrau cerdded, llynnoedd, cyfleusterau chwaraeon a digon o le ar gyfer picnic.

Mae Canolfan Gelfyddydau Canolbarth Lloegr ar gyrion y parc hefyd, gyda theatr, sinema, arddangosfeydd a gweithdai drwy gydol y flwyddyn.

Beth sy’n digwydd yn Birmingham?

O Hippodrome Birmingham i Symphony Hall, Arena Utilita a’r NEC, mae Birmingham yn cynnal comedi, cyngherddau a digwyddiadau mawr drwy gydol y flwyddyn. Mae amgueddfeydd ac orielau’r ddinas yn cynnal arddangosfeydd a gweithgareddau sy’n newid.

Mae gan Birmingham hefyd galendr prysur o wyliau bwyd, cerddoriaeth, celfyddydol a diwylliannol, ochr yn ochr â digwyddiadau chwaraeon mawr.

Edrychwch ar y rhestrau diweddaraf cyn i chi deithio i weld beth sy’n digwydd tra byddwch chi yn y ddinas.

Beth i ymweld ag ef yn Birmingham am y tro cyntaf

Ddim yn siŵr ble i ddechrau? Os mai hwn yw eich ymweliad cyntaf â Birmingham, gallech gyfuno ychydig o ffefrynnau canol y ddinas mewn un diwrnod.

Dechreuwch o amgylch Bullring & Grand Central cyn cerdded tuag at Amgueddfa ac Oriel Gelf Birmingham a Llyfrgell Birmingham. O’r fan honno, parhewch tuag at Brindleyplace a’r camlesi, neu dreulio’r prynhawn yn archwilio’r Ardal Gemwaith.

Os ydych chi’n teithio gyda phlant, mae Cadbury World, Thinktank a Chanolfan Genedlaethol SEA LIFE yn ychwanegiadau hawdd at wyliau yn Birmingham.

Cyrraedd Birmingham ar y trên

Mae Birmingham New Street mor ganolog ag y gallai gorsaf fod, gyda Bullring & Grand Central, siopau, bwytai a nifer o atyniadau mawr gerllaw.

Mae gorsafoedd Birmingham Moor Street ac Snow Hill hefyd yn gwasanaethu canol y ddinas, ac mae Birmingham International yn darparu mynediad rheilffordd ar gyfer yr NEC a Maes Awyr Birmingham.

Defnyddiwch ein cynllunydd teithiau i wirio amseroedd trenau byw a phrynu eich tocynnau drwy ein gwefan neu ap, heb unrhyw ffioedd archebu.

Mae’r llwybrau trên poblogaidd i Birmingham yn cynnwys:

• Caerdydd i Birmingham
• Abertawe i Birmingham
• Caer i Birmingham
• Amwythig i Birmingham
• Aberystwyth i Birmingham

Cynlluniwch eich diwrnod yn Birmingham

I gael y digwyddiadau, yr arddangosfeydd a’r syniadau diweddaraf ynghylch beth i ymweld ag ef yn Birmingham, ewch i Visit Birmingham cyn i chi deithio, yna prynwch eich tocynnau trên gyda ni a dechrau cynllunio eich diwrnod.