Noson Tân Gwyllt yng Nghymru: yr arddangosfeydd tân gwyllt gorau
Mae rhywbeth arbennig am Noson Tân Gwyllt yng Nghymru. P’un a fyddwch wedi lapio’n gynnes ar ochr bryn o amgylch tân tanbaid neu’n gwylio tân gwyllt yn ffrwydro dros ragfur castell, mae 5 Tachwedd yn esgus gwych i fynd allan ac archwilio rhywle newydd. Yn well byth, mae’n hawdd cyrraedd llawer o’r arddangosfeydd gorau yng Nghymru ar ein trenau. Cynlluniwch eich taith ymlaen llaw a gadael eich car gartref.
Dyma rai o’r arddangosfeydd tân gwyllt gorau ledled Cymru.
1. Tân gwyllt Cae Cooper Caerdydd
Mae arddangosfa Noson Tân Gwyllt Caerdydd yn un o’r rhai mwyaf yng Nghymru, gyda waliau canoloesol dramatig y castell yn gefndir iddi. Mae’r awyrgylch yng nghanol y ddinas ar y noson hon yn wych, gyda stondinau bwyd, ffair a thorfeydd bywiog.
Sut i gyrraedd yno: Mae Cae Cooper yng nghanol dinas Caerdydd, sy’n daith gerdded fer o orsaf Caerdydd Canolog a gorsaf Heol y Frenhines Caerdydd. Gyda threnau’n rhedeg yn aml o bob rhan o’r rhwydwaith, dyma un o’r arddangosfeydd mawr hawsaf i fynd iddi heb gar yng Nghymru.
2. Tân gwyllt Abertawe ar Faes San Helen
Cynhelir arddangosfa tân gwyllt flynyddol Abertawe ar Faes San Helen, yn ochr orllewinol y ddinas. Mae’n ddigwyddiad sydd wedi’i drefnu’n dda gyda choelcerth go iawn, cerddoriaeth fyw a bwyd, ac mae’n denu torf fawr bob blwyddyn.
Sut i gyrraedd yno: Mae San Helen tua milltir a hanner o orsaf Abertawe, gyda chysylltiadau bws lleol o ganol y ddinas. Mae trenau uniongyrchol rheolaidd i Abertawe o orsaf Caerdydd Canolog (sy’n cymryd tuag awr) a Chaerfyrddin (sy’n cymryd tua 30 munud).
3. Tân gwyllt Casnewydd
Mae Casnewydd yn cynnal Noson Tân Gwyllt fywiog bob blwyddyn, fel arfer yn RUFC Salop Casnewydd ar gyrion gogleddol y ddinas. Mae digon o le ar y tir ac mae’r arddangosfa’n tueddu i fod o faint hael ar gyfer digwyddiad mewn dinas.
Sut i gyrraedd yno: Mae gan orsaf Casnewydd gysylltiadau da, gyda threnau rheolaidd o orsaf Caerdydd Canolog (sy’n cymryd tua 15 munud) a gwasanaethau o’r gorllewin a’r gogledd drwy gydol y nos. Tarwch olwg ar wefan Cyngor Dinas Casnewydd yn nes at y dyddiad i gael y manylion ac i weld a oes unrhyw newidiadau i’r lleoliad.
4. Tân gwyllt Wrecsam
Mae tref fwyaf Gogledd Cymru yn mynd amdani ar gyfer Noson Tân Gwyllt. Fel arfer, cynhelir y brif arddangosfa yn Fferm Penyllan, gan ddenu ymwelwyr o bob rhan o’r rhanbarth.
Sut i gyrraedd yno: Mae gorsaf Wrecsam Cyffredinol a gorsaf Wrecsam Canolog yn cael eu gwasanaethu’n dda o Gaer ac Amwythig, sy’n golygu ei fod yn ddewis da os ydych chi’n dod o’r gogledd. Tarwch olwg ar y rhestrau lleol i weld y lleoliad a’r amser bob blwyddyn.
5. Tân gwyllt y Rhyl
Mae arddangosfa Noson Tân Gwyllt y Rhyl wedi’i gosod ar lan y môr, ac mae’n anodd curo arddangosfa tân gwyllt dros y môr! Wedi’i leoli yn Lyons Robin Hood, mae swyn syml, diymhongar ar nosweithiau fel hyn. Mae promenâd y traeth yn fan ffafriol iawn i'w gwylio.
Sut i gyrraedd yno: Mae gorsaf y Rhyl ar Reilffordd Arfordir Gogledd Cymru, gyda threnau o Gaer (sy’n cymryd tua 45 munud) a Chyffordd Llandudno (tua 25 munud).
6. Tân gwyllt Llandudno
Mae arddangosfa tân gwyllt Llandudno ym mis Tachwedd yn manteisio i’r eithaf ar leoliad anhygoel y dref, gyda phentir y Gogarth yn gefndir iddi a’r bae yn gorwedd o’ch blaen. Mae’n un o’r lleoliadau mwyaf prydferth i fod yng Nghymru ar Noson Tân Gwyllt.
Sut i gyrraedd yno: Gorsaf Llandudno yw'r olaf ar y llinell gangen o Gyffordd Llandudno, gyda chysylltiadau o Gaer, Caerdydd ac ar draws y rhwydwaith.
Nodyn cyflym cyn i chi deithio: mae dyddiadau a lleoliadau’r arddangosfeydd tân gwyllt yn newid o flwyddyn i flwyddyn. Dylech bob amser holi’r cyngor lleol neu drefnydd y digwyddiad cyn gwneud trefniadau. Prynwch eich tocynnau trên yn gynnar ar nosweithiau prysur.
