External view of the grounds and gardens at Chester Cathedral
Llun gan Chester Cathedral/Gareth Rainsforth

Efallai nad Caer yw dinas fwyaf y DU, ond mae dros 2,000 o flynyddoedd o hanes wedi gadael llu o bethau i’w gweld a’u mwynhau ar hyd ei strydoedd.

Gallwch gerdded o amgylch muriau hynafol y ddinas, siopa ar ddwy lefel o dan The Rows, treulio amser wrth ymyl Afon Dyfrdwy neu dreulio diwrnod llawn yn Sw Caer - un o sŵau enwocaf y DU.

Mae llawer o olygfeydd mwyaf adnabyddus Caer yn ddigon agos i’w mwynhau ar droed. Gyda gorsaf drenau Caer dim ond 10 munud ar droed o’r canol hanesyddol, gallwch ddechrau archwilio bron ar unwaith.

 

Camwch i mewn i hanes Caer

Muriau Dinas Caer

Os nad ydych chi’n siŵr beth i’w weld yng Nghaer yn gyntaf, mae muriau'r ddinas yn lle da i ddechrau.

Nhw yw’r cylch mwyaf cyflawn o furiau amddiffynnol Rhufeinig a chanoloesol ym Mhrydain, gyda’r llwybr llawn yn cymryd tua 45 munud i'w gerdded. Ar hyd y ffordd, byddwch yn mynd heibio i dirnodau gan gynnwys Cloc Eastgate, Eglwys Gadeiriol Caer ac Afon Dyfrdwy.

Mae mynediad am ddim i’r muriau, felly maen nhw’n un o’r ffyrdd hawsaf o gael blas ar y ddinas heb orfod gwario ceiniog.

Yr Amffitheatr Rufeinig

Caer oedd caer Rufeinig Deva Victrix ar un adeg, ac mae olion yr hanes hwnnw’n parhau ledled canol y ddinas.

Yr amffitheatr Rufeinig yw’r amffitheatr Rufeinig fwyaf a gloddiwyd hyd yma ym Mhrydain a gellir ei gweld am ddim, dafliad carreg o furiau’r ddinas.

Profiad Rhufeinig DEVA

I gael profiad mwy ymarferol ar Gaer Rufeinig, mae Profiad Rhufeinig DEVA yn mynd â chi’n ôl bron 2,000 o flynyddoedd.

Mae’r atyniad yn ail-greu rhannau o’r gaer Rufeinig ac yn defnyddio cymeriadau byw, setiau ac arddangosfeydd rhyngweithiol i ddangos sut beth fyddai bywyd bob dydd yn Deva Victrix.

 

Ymweld ag Eglwys Gadeiriol Caer

Mae Eglwys Gadeiriol Caer wedi bod wrth galon y ddinas ers canrifoedd ac mae’n cyfuno pensaernïaeth ganoloesol, cerfiadau hanesyddol, arddangosfeydd a digwyddiadau rheolaidd.

Archwiliwch ar lefel y ddaear neu dringwch yn uwch i fwynhau profiad Cathedral at Height i gael golygfeydd ar draws Caer a’r ardal gyfagos.

Os ydych chi wedi teithio i Gaer ar y trên gyda ni, gallwch hefyd fanteisio ar ein cynnig gostyngol ar gyfer taith o amgylch Eglwys Gadeiriol Caer. I hawlio’r cynnig, dangoswch docyn trên TrC dilys ar y diwrnod i gael dau docyn am £15 neu docyn teulu am £25.

 

Siopa o dan The Rows

The Rows yw un o’r nodweddion sy’n gwneud Caer yn hawdd ei hadnabod.

Mae’r orielau dwy haen dan do hyn yn rhedeg ar hyd rhannau o brif strydoedd siopa’r ddinas ac yn dyddio’n ôl tua 700 mlynedd. Yn wahanol i stryd fawr safonol, gallwch bori drwy siopau ar lefel y stryd cyn mynd i fyny’r grisiau i haen arall o siopau annibynnol, caffis ac enwau cyfarwydd.

Mae Marchnad Caer gerllaw hefyd os hoffech chi stopio i gael rhywbeth i’w fwyta neu i bori ymysg masnachwyr lleol.

 

Gweithgareddau i’r teulu cyfan yng Nghaer

Sw Caer

I lawer o deuluoedd, Sw Caer yw’r prif atyniad. Mae’n ymestyn dros oddeutu 130 acer ac mae’n gartref i fwy na 30,000 o anifeiliaid, gyda chynefinoedd yn amrywio o amgylcheddau trofannol i wlypdiroedd ac ardal fwy newydd Calon Affrica.

Mae’r bws X1 yn rhedeg o’r tu allan i orsaf drenau Caer, sy’n ei gwneud yn hawdd cyrraedd yno heb gar.

Dangoswch eich tocyn trên TrC pan fyddwch chi’n cyrraedd i gael ail docyn sw am hanner pris.

Amgueddfa Grosvenor

Yn nes at ganol y ddinas, mae Amgueddfa Grosvenor yn arddangos archaeoleg Caer, ei hanes naturiol, ei chelfyddyd a’i hanes lleol.

Mae ei chasgliad Rhufeinig yn arbennig o ddiddorol, gan gynnwys cerrig coffa a gwrthrychau sy’n gysylltiedig â gorffennol milwrol y ddinas. Mae mynediad am ddim, sy’n ei gwneud yn ddefnyddiol os ydych chi’n chwilio am rywbeth dan do neu’n dibynnu ar gyllideb dynnach.

 

Treuliwch amser ger Afon Dyfrdwy

Mae mynd am dro ar hyd Afon Dyfrdwy yn cynnig profiad mwy hamddenol ar ôl crwydro canol prysur y ddinas.

Dilynwch lwybrau glan yr afon, croeswch Bont Grog Queen’s Park neu eisteddwch wrth ymyl The Groves gyda rhywbeth i’w fwyta a’i yfed.

Os byddai’n well gennych weld y ddinas o’r dŵr, mae ChesterBoat yn cynnig teithiau i weld atyniadau ar hyd yr afon, gan gynnwys teithiau byrrach yn ystod y dydd a theithiau hirach.

 

Adloniant a digwyddiadau yng Nghaer

Mae Storyhouse yn dod â theatr, sinema, llyfrgell a lleoedd i fwyta gyda’i gilydd o dan yr un to. Cynhelir perfformiadau a dangosiadau drwy gydol y flwyddyn.

Mae’r ddinas hefyd yn cynnal digwyddiadau bwyd, llenyddiaeth a cherddoriaeth, cyfarfodydd rasio a theatr awyr agored. Mae’n werth edrych beth sy’n digwydd ar ddyddiadau eich ymweliad.

Am rywbeth sydd â naws dywyllach, ymunwch â Chester Ghost Tour. Pan fyddwch yn teithio gyda ni, gallwch hawlio pris gostyngol o ddau docyn am £15 neu docyn teulu am £25.

 

Pethau am ddim i’w gwneud yng Nghaer

Ydych chi’n meddwl tybed beth allwch chi ei wneud yng Nghaer am ddim? Cryn dipyn fel mae’n digwydd.

  • Cerddwch furiau’r ddinas
  • Ymweld â’r Amffitheatr Rufeinig
  • Pori o amgylch The Rows
  • Ymweld ag Amgueddfa Grosvenor
  • Cerdded wrth ymyl Afon Dyfrdwy
  • Treulio amser ym Mharc Grosvenor

Mae hyn yn gwneud Caer yn ddewis da os ydych chi eisiau cyfuno atyniadau am dâl ag atyniadau am ddim ar droed.

 

Lleoedd i ymweld â nhw yng Nghaer am y tro cyntaf

Dechreuwch gyda muriau’r ddinas, yna stopiwch wrth Gloc Eastgate ac Eglwys Gadeiriol Caer. Nesaf, ewch drwy The Rows cyn gorffen wrth ymyl Afon Dyfrdwy.

Mae hynny’n rhoi cymysgedd da i chi o hanes, pensaernïaeth, siopa a golygfeydd glan yr afon Caer. Mae’n hawdd gweld popeth mewn un diwrnod.

Os yw Sw Caer yn uchel ar eich rhestr, neilltuwch ddiwrnod ar ei ben ei hun i hynny yn hytrach na cheisio ei wasgu i amserlen canol dinas.

 

Teithio i Gaer ar drên

Mae gorsaf drenau Caer tua 10 munud ar droed o’r canol, ac mae bysiau a thrafnidiaeth leol ar gael ar gyfer llefydd ymhellach i ffwrdd.

Defnyddiwch ein cynllunydd teithiau i wirio amseroedd trenau byw a phrynu eich tocynnau ar ein gwefan neu ap.

Mae rhai o’n llwybrau mwyaf poblogaidd yn cynnwys:

 

Cynlluniwch eich diwrnod yng Nghaer

Dal i benderfynu beth i’w weld yng Nghaer? Gall diwrnod yn y canol gynnwys y muriau, yr eglwys gadeiriol, The Rows ac Afon Dyfrdwy yn gyfforddus. Mae arhosiad hirach yn rhoi mwy o amser ar gyfer Sw Caer, amgueddfeydd a theithiau tywys.

I gael rhagor o lefydd i ymweld â nhw yng Nghaer, digwyddiadau a syniadau ar gyfer eich arhosiad, ewch i Visit Chester cyn i chi deithio.